নেশ্যনেল ডেস্ক, 8 জুলাই : পানী অপচয় কৰিলে এতিয়াৰে পৰা জৰিমনা ভৰিব লাগিব ৷ ঘৰুৱাভাৱে ব্যৱহৃত পানী যদি অপচয় কৰে বা আন কোনো কামত ব্যৱহাৰ কৰে, তেন্তে ভৰিব লাগিব জৰিমনা ৷ ইতিমধ্যে ৰাজস্থান চৰকাৰৰ জনস্বাস্থ্য কাৰিকৰী বিভাগৰ সচিবৰ তৰফৰ পৰা এই সন্দৰ্ভত এক নিৰ্দেশ জাৰি কৰা হৈছে ৷ এই নিৰ্দেশনাৰ অধীনত যদি কোনোবাই ঘৰুৱা পানী আন কোনো কামত ব্যৱহাৰ কৰে বা অপচয় কৰে তেন্তে তেওঁৰ বিৰুদ্ধে ব্যৱস্থা গ্ৰহণ কৰা হ’ব ৷ যদি কোনোবাই এই ভুল কৰে, তেন্তে জৰিমনা ভৰিব লাগিব আৰু পানীৰ সংযোগো বিচ্ছিন্ন হ'ব পাৰে ৷ আজিৰে পৰা ৰাজ্যখনত কাৰ্যকৰী হৈছে এই নতুন নিৰ্দেশ ৷ পানীৰ অপব্যৱহাৰৰ ক্ষেত্ৰতো এহেজাৰ টকা জৰিমনা বিহা হ’ব ৷ জল যোগান সচিবে জাৰি কৰিছে এই নিৰ্দেশ ৷
বিগত 5 জুলাইত জল যোগান বিভাগৰ চৰকাৰী সচিব সমিত শৰ্মাই জাৰি কৰিছিল এই চাৰ্কুলাৰ ৷ তেওঁ কয় যে জল যোগান আৰু নলা নিগম আইন, 1979ৰ বিধানসমূহ পানী সংৰক্ষণৰ বাবে ফলপ্ৰসূভাৱে কাৰ্যকৰী কৰাটো প্ৰয়োজন ৷ এই আইনৰ অধীনত ঘৰুৱা পানী অপচয় কৰাসকলৰ বিৰুদ্ধে ব্যৱস্থা গ্ৰহণ কৰা হ’ব ৷ এই আইনৰ বিধানসমূহ কঠোৰভাৱে কাৰ্যকৰী কৰাৰ প্ৰয়োজনীয়তা আছে বুলিও তেওঁ কয় ৷ আইনখনৰ বিধানে অপচয় ৰোধ কৰিব আৰু আমাৰ জলসম্পদ সংৰক্ষণ কৰিব বুলি উল্লেখ কৰি তেওঁ কয় যে, পানী সীমিত, যিটো বৰ্তমান আৰু ভৱিষ্যত প্ৰজন্মৰ বাবে অতি প্ৰয়োজনীয় ৷
লগতে পঢ়ক :জল সংকট: অপ্ৰয়োজনীয় কামত পানী ব্যৱহাৰ কৰাৰ বাবে ২২টা পৰিয়ালক ৫ হাজাৰকৈ জৰিমনা - Bengaluru Water Crisis
এইবোৰ কামত পানী ব্যৱহাৰ কৰা নহ’ব :
ঘৰুৱা কামত দিয়া পানী অঘৰুৱা কামত ব্যৱহাৰ কৰা নহ’ব ৷ কোনো ব্যৱসায় বা নিৰ্মাণত ঘৰুৱা পানী ব্যৱহাৰ কৰা নহ’ব ৷ পাকঘৰ আৰু ঘৰুৱা বাগিচাৰ বাহিৰে আন বাৰী আৰু জলসিঞ্চনৰ কামত ঘৰুৱা পানী ব্যৱহাৰ কৰা নহ’ব ৷ অট্টালিকা নিৰ্মাণ, ৰাজহুৱা ফোৱাৰা, চুইমিং পুল বা অন্যান্য সজ্জাৰ কামতো ঘৰুৱা পানী ব্যৱহাৰ কৰা নহ’ব ৷ ৰেষ্টুৰেণ্ট, হোটেল, বৰ্ডিং হাউচ বা আৱাসিক ক্লাব, থিয়েটাৰ, চিনেমা হল আনকি পথত পানী যোগান ধৰাৰ বাবেও ঘৰুৱা পানী ব্যৱহাৰ কৰিব নোৱাৰিব ৷ বাহন ধোৱাৰ বাবেও ঘৰুৱা পানী ব্যৱহাৰ কৰিব নোৱাৰিব ৷ পি এইচ ই ডিৰ দ্বাৰা পানী যোগান ধৰা চৌহদৰ মালিক বা দখলকাৰীয়ে পানী অপচয় কৰিব নোৱাৰিব ৷ যদি চাৰ্ভিচ পাইপ, ফিটিং বা টেপৰ পৰা লিকেজ হয় তেন্তে গ্ৰাহকে তৎক্ষণাত মেৰামতি কৰিব লাগিব ৷
পানীৰ অপব্যৱহাৰ আৰু অপচয়ৰ বিৰুদ্ধে ব্যৱস্থা গ্ৰহণ কৰা হ’ব :
যদি কোনো গ্ৰাহকে পানী অপচয় কৰে আৰু দোষী সাব্যস্ত হয় তেন্তে তেওঁক 1000 টকা পৰ্যন্ত জৰিমনা বিহা হ’ব ৷ ইয়াৰ পাচতো যদি পানীৰ অপচয় বন্ধ নহয় তেন্তে প্ৰতিদিনে পঞ্চাশ টকাৰ অতিৰিক্ত জৰিমনা আদায় কৰা হ’ব ৷ ইয়াৰ পিচতো পানীৰ অপচয় হ’লে পানীৰ সংযোগ বিচ্ছিন্ন হ’ব আৰু ইয়াৰ বাবে শাস্তিৰো ব্যৱস্থা কৰা হৈছে ৷ পানী যোগান আৰু নলা নিগম আইন 1979ৰ অধীনত পি এইচ ই ডিৰ বিষয়াসকলে যিকোনো চৌহদৰ পৰা পানীৰ সংযোগ বিচ্ছিন্ন কৰিব পাৰে ৷ গ্ৰাহকে পৰিদৰ্শনৰ বাবে অহা বিষয়া বা কৰ্মচাৰীক প্ৰৱেশত বাধা দিব নোৱাৰে ৷
উল্লেখ্য যে, পানীৰ অপচয় আৰু অপব্যৱহাৰ তথা পানীৰ নাটনি ৰোধ কৰিবলৈ ৰাজস্থানৰ জনস্বাস্থ্য কাৰিকৰী বিভাগে লৈছে এই কঠোৰ ব্যৱস্থা ৷
লগতে পঢ়ক :হাথৰছৰ ধৰ্মীয় সমাৱেশত বিষাক্ত দ্ৰব্য স্প্ৰে’ কৰিছিল কোনোৱে: অধিবক্তাৰ অভিযোগ - Hathras stampede tragedy
