নিউজ ডেস্ক, 10 অক্টোবৰ: টাটা গ্ৰুপৰ মূল কোম্পানী টাটা ছন্সৰ প্ৰাক্তন অধ্যক্ষ ৰতন নাভাল টাটাই টাটা গ্ৰুপক দেশৰ সৰ্ববৃহৎ ব্ৰেণ্ড হিচাপে গঢ়ি তোলাত গুৰুত্বপূৰ্ণ ভূমিকা পালন কৰিছিল । ব্যৱসায়িক বুদ্ধিমত্তা, দূৰদৰ্শিতা আৰু শক্তিশালী কৰ্ম সংস্কৃতিৰ বাবে পৰিচিত টাটা ছন্স, টাটা ইণ্ডাষ্ট্ৰীজ, টাটা মটৰ্ছ, টাটা ষ্টীল আৰু টাটা কেমিকেলছৰ চেয়াৰমেন এমেৰিটাছ ৰতন টাটাই ৮৬ বছৰ বয়সত বুধবাৰে মুম্বাইৰ এখন চিকিৎসালয়ত সংকটজনক অৱস্থাত মৃত্যুক আঁকোৱালি লয় ।
মুম্বাইৰ ব্ৰিচ কেণ্ডী হাস্পতালৰ আই চি ইউত শেষ নিশ্বাস ত্যাগ কৰে ৰতন টাটাই । ৰতন টাটাই যি শিকিলে, যি অৱদান আগবঢ়ালে, তেওঁ আনকো আগুৱাই লৈ গ’ল । তেওঁৰ সফলতা আৰু তেওঁৰ আচৰণ নিশ্চয় তেওঁৰ উত্তৰাধিকাৰ । তেওঁৰ জীৱনৰ কেইটামান উল্লেখনীয় দিশ ইয়াত উল্লেখ কৰা হ’ল-
ৰতন টাটাৰ জীৱনত এভুমুকি (RATAN NAVAL TATA PASSES AWAY)
- 1937 চন : নাভাল টাটাৰ ঘৰত ৰতন টাটাৰ জন্ম
- 1955 চন: 17 বছৰ বয়সত কৰ্ণেল বিশ্ববিদ্যালয়লৈ (আমেৰিকা) অধ্যয়নৰ বাবে যাত্ৰা ৰতন টাটাৰ ৷ সাত বছৰ কাল বাস্তুকলা আৰু আভিযান্ত্ৰিক বিভাগত অধ্যয়ন কৰে ৰতন টাটাই ৷
- 1962 চন: বাস্তুকলা (আৰ্কিটেক্সাৰ) বিষয়ত স্নাতক ডিগ্ৰী লাভ
- 1962 চন: কেবাটাও কোম্পানীত চাকৰি কৰাৰ পিছত 1962 চনত টাটা গ্ৰুপত যোগদান ৷ তাৰ পূৰ্বে লছ এঞ্জেলছত জ’নছ আৰু এমন্সৰ সৈতে কিছুদিন কাম কৰে ৷
- তেওঁ টাটা ইণ্ডাষ্ট্ৰীজৰ সহযোগী হিচাপে টাটা গ্ৰুপত যোগদান কৰে; বছৰৰ শেষৰ ফালে তেওঁ টাটা ইঞ্জিনিয়াৰিং এণ্ড ইঞ্জিনিয়াৰ কোম্পানীৰ (বৰ্তমান টাটা মটৰছ বুলি কোৱা হয়) জামছেদপুৰ প্লাণ্টত ছমাহৰ প্ৰশিক্ষণ লয় ।
- 1963 চন: প্ৰশিক্ষণ কাৰ্যসূচীৰ বাবে টাটা আইৰন এণ্ড ষ্টীল কোম্পানী বা টিস্কো (বৰ্তমান টাটা ষ্টীল বুলি কোৱা হয়)লৈ যায় ।
- 1965 চন: টিস্কোৰ অভিযান্ত্ৰিক বিভাগত কাৰিকৰী বিষয়া নিযুক্তি ।
- 1969 চন: অষ্ট্ৰেলিয়াত টাটা গ্ৰুপৰ আৱাসী প্ৰতিনিধি হিচাপে কাম কৰিছিল ।
- 1970 চন: ভাৰতলৈ উভতি আহি অলপ দিনৰ বাবে টাটা কনছালটেন্সি চাৰ্ভিচেছত যোগদান কৰে, যিটো তেতিয়াৰ এটা নৱজাত চফ্টৱেৰ প্ৰতিষ্ঠান আছিল ।
- 1971 চন: 1971 চনত ৰতন টাটাক নেশ্যনেল ৰেডিঅ’ এণ্ড ইলেক্ট্ৰনিক্স কোম্পানী লিমিটেডৰ ভাৰপ্ৰাপ্ত সঞ্চালক হিচাপে নিযুক্তি দিয়া হয় ।
- 1974 চন: টাটা ছন্সৰ ব’ৰ্ডত পৰিচালক হিচাপে যোগদান কৰে ।
- 1975 চন: হাৰ্ভাৰ্ড বিজনেছ স্কুলত এডভান্সড মেনেজমেণ্ট প্ৰগ্ৰেম সম্পূৰ্ণ কৰে ।
- 1981 চন: টাটা ইণ্ডাষ্ট্ৰীজৰ অধ্যক্ষ হয় ৰতন টাটা, য’ত তেওঁ ইয়াক এটা সংঘবদ্ধ থিংক টেংকলৈ ৰূপান্তৰিত কৰাৰ দায়িত্ব লয় আৰু উচ্চ প্ৰযুক্তিৰ ব্যৱসায়ত নতুন উদ্যোগৰ প্ৰচাৰক হয় ।
- 1983 চন: ৰতন টাটাই মুকলি কৰিলে নিমখৰ ব্ৰেণ্ড- টাটা ছল্ট, যিটো ভাৰতৰ প্ৰথম ৰাষ্ট্ৰীয় ব্ৰেণ্ডেড নিমখ আছিল । টাটা ছল্ট আছিল প্ৰথম কোম্পানী যিয়ে আয়’ডিনযুক্ত বাষ্পীভৱনৰ দ্বাৰা প্ৰস্তুত কৰা নিমখ প্ৰৱৰ্তন কৰিছিল, যি সময়ত আনব্ৰেণ্ডেড আৰু আনপেকেজড নিমখ জনপ্ৰিয় আছিল ।
- 1986 চন: ভাৰতৰ তেতিয়াৰ বিলাসী ৰাষ্ট্ৰীয় পৰিবহণ বিমান এয়াৰ ইণ্ডিয়াৰ অধ্যক্ষ হিচাপে নিযুক্তি লাভ কৰে ৰতন টাটাই । ১৯৮৯ চনত তেওঁ এই পদ এৰি দিয়ে ।
- 25 মাৰ্চ, 1991 চন: জাহাংগীৰ ৰতনজী দাদাভোয় টাটা (জে আৰ ডি টাটা)ৰ পিছত ৰতন টাটা টাটা ছন্সৰ অধ্যক্ষ আৰু টাটা ট্ৰাষ্টৰ অধ্যক্ষ হয় । ভাৰতীয় অৰ্থনীতিৰ উদাৰীকৰণৰ লগে লগে টাটা গোটৰ পুনৰ্গঠন আৰম্ভ হৈছিল ।
- 1999 চন: ৰতন টাটা আৰু তেওঁৰ দলটোৱে কোম্পানীটোৰ নতুন যাত্ৰীবাহী গাড়ীৰ ব্যৱসায় আমেৰিকাৰ গাড়ী নিৰ্মাতা ফৰ্ড মটৰ্ছৰ ওচৰলৈ লৈ যোৱাৰ সময়ত কোম্পানীটোৱে ইয়াক নাকচ কৰিছিল । যাত্ৰীবাহী বাহন (পিভি) ছেগমেণ্টত ব্ৰেণ্ডটোৰ বিশেষজ্ঞতাৰ অভাৱক লৈ তেওঁলোকে ঠাট্টা কৰিছিল । ই বিদ্ৰুপৰ ৰূপ ল’লে আৰু ৰতন টাটাই পাছলৈ ফ’ৰ্ড মটৰছৰ পৰা জাগুৱাৰ-লেণ্ড ৰভাৰ (জেএলআৰ) ক্ৰয় কৰে ।
- 2000 চন: ভাৰত চৰকাৰৰ তৃতীয় সৰ্বোচ্চ অসামৰিক বঁটা পদ্মভূষণ লাভ কৰে ৰতন টাটাই । একে বছৰতে টাটা টিয়ে 271 মিলিয়ন ইউৰোত বিশ্বব্যাপী চাহ ব্ৰেণ্ড টেটলি গ্ৰুপকো ক্ৰয় কৰে । তেওঁৰ নেতৃত্বত টাটা গ্ৰুপৰ বিকাশ আৰু বিশ্বায়নৰ অভিযানে গতি লাভ কৰে ৷ নতুন সহস্ৰাব্দত ক’ৰাছ, জাগুৱাৰ লেণ্ড ৰ’ভাৰ, ব্ৰুনাৰ মণ্ড, জেনেৰেল কেমিকেল ইণ্ডাষ্ট্ৰিয়েল প্ৰডাক্টছ আৰু ডায়েউকে ধৰি কেইবাটাও হাই-প্ৰফাইল উৎপাদন টাটাই অধিগ্ৰহণ কৰা দেখা যায় ।
- 2004 চন: টাটা ছন্সৰ অধ্যক্ষ হিচাপে ৰতন টাটাৰ নেতৃত্বত গ্ৰুপটোৰ আই টি ফাৰ্ম টাটা কনছালটেন্সি চাৰ্ভিচেছ (টি চি এছ) ভাৰতীয় ষ্টক এক্সচেঞ্জত তালিকাভুক্ত হৈছিল । মাৰ্কেটকেপৰ তথ্য অনুসৰি আই টি প্ৰতিষ্ঠানটোৰ মূল্য এতিয়া ১৮৩.৩৬ বিলিয়ন ডলাৰ আৰু ই ইণ্ডিয়া ইনকৰ্পৰেশ্যনৰ দ্বিতীয় বৃহত্তম কোম্পানী ।
- 2006 চন: টাটাই টাটাস্কাই আৰম্ভ কৰি ডাইৰেক্ট টু হোম (ডি টি এইচ) টেলিভিছন ব্যৱসায়তো প্ৰৱেশ কৰে । এই ব্যৱসায় এতিয়া টেলিভিছন নেটৱৰ্ক বিতৰণ খণ্ডৰ অন্যতম বৃহৎ ব্যৱসায় ।
- 2008 চন: টাটা গ্ৰুপ আৰু আমেৰিকাৰ গাড়ী নিৰ্মাতা ফৰ্ড মটৰ্ছৰ বাবে এবছৰ বিদ্ৰুপৰ কথা । টাটা মটৰ্ছে ফৰ্ড মটৰছৰ পৰা ২.৫ বিলিয়ন ডলাৰত জাগুৱাৰ-লেণ্ড ৰভাৰ (জে এল আৰ) ক্ৰয় কৰিছিল । টাটাই ফ’ৰ্ডক আৰ্থিক লোকচান, কঠোৰ প্ৰতিযোগিতা আৰু গুণগত সমস্যাৰে ভৰা চুক্তিৰ পৰা উদ্ধাৰ কৰিছিল ৷ সেই বছৰতে ৰতন টাটাই ভাৰত চৰকাৰৰ পৰা দ্বিতীয় সৰ্বোচ্চ অসামৰিক বঁটা পদ্ম বিভূষণো লাভ কৰে । একে বছৰতে ভাৰতৰ সাধাৰণ মানুহৰ বাবে গাড়ী কিনাৰ সপোন বাস্তৱ কৰি তুলিবলৈ তেওঁ টাটা নেনো মুকলি কৰে । এইখন আছিল দেশৰ আটাইতকৈ কম মূল্যৰ গাড়ী, যাৰ দাম আছিল ১ লাখ ।
- ডিচেম্বৰ 2012 চন: টাটা গ্ৰুপৰ সৈতে ৫০ বছৰ কটোৱাৰ পাছত টাটা ছন্সৰ অধ্যক্ষ পদৰ পৰা পদত্যাগ কৰি টাটা ছন্সৰ অধ্যক্ষ এমেৰিটাছ হিচাপে নিযুক্তি লাভ কৰে ৰতন টাটাই ।
- 2022 চন: টাটা ছন্সৰ ভাৰপ্ৰাপ্ত অধ্যক্ষ পদৰ পৰা পদত্যাগ কৰাৰ এটা দশক পিছত, ভাৰত চৰকাৰৰ পৰা এয়াৰ ইণ্ডিয়াক ক্ৰয় কৰি ৰতন টাটাই বিমান সংস্থাটোক টাটা পৰিয়াললৈ ঘূৰাই আনিছিল । এয়াৰ ইণ্ডিয়া অধিগ্ৰহণৰ বাবে টাটা গ্ৰুপে চৰকাৰক ১৮,০০০ কোটি টকা দিছিল ।
- 9 অক্টোবৰ 2024 চন: ৰতন টাটাৰ ৮৬ বছৰ বয়সত মৃত্যু হয় ।