নিউজ ডেস্ক, 9 অক্টোবৰ: বিখ্যাত উদ্যোগপতি তথা টাটা ছন্সৰ অধ্যক্ষ ৰতন টাটাক স্বাস্থ্যৰ অৱনতি ঘটাত দক্ষিণ মুম্বাইৰ এখন ব্যক্তিগত চিকিৎসালয়ৰ আই চি ইউলৈ স্থানান্তৰ কৰা বুলি এক সূত্ৰই প্ৰকাশ কৰিছে । ব্ৰিচ কেণ্ডি হাস্পতালত ভৰ্তি হোৱা ৰতন টাটাক আই চি ইউলৈ স্থানান্তৰ কৰা হয় । তেওঁৰ অৱস্থা সংকটজনক বুলি সূত্ৰটোৱে কয় ।
মাত্ৰ দুদিন আগতে ৰতন টাটাই এক্সত পোষ্ট কৰিছিল যে তেওঁ সুস্থ হৈ আছে । টাটা গ্ৰুপৰ ৱেবছাইট অনুসৰি ৰতন টাটা ১৯৯১ চনৰ পৰা ২০১২ চনৰ ২৮ ডিচেম্বৰত অৱসৰ লোৱালৈকে টাটা গ্ৰুপৰ হোল্ডিং কোম্পানী টাটা ছন্সৰ অধ্যক্ষ আছিল । ২০১২ চনৰ ২৯ ডিচেম্বৰৰ পৰা কাৰ্যকৰী হোৱাকৈ টাটাক টাটা সন্স, টাটা ইণ্ডাষ্ট্ৰীজ, টাটা মটৰ্ছ, টাটা ষ্টীল আৰু টাটা কেমিকেলছৰ চেয়াৰমেন এমেৰিটাছৰ সন্মানীয় উপাধি প্ৰদান কৰা হৈছে ।
১৯৬২ চনত টাটা ষ্টীল বিভাগৰ দ্বাৰা তেওঁ নিজৰ কেৰিয়াৰ আৰম্ভ কৰে আৰু ৯ বছৰৰ পিছত নেচনেল ৰেডিঅ’ এণ্ড ইলেক্ট্ৰনিক্স কোম্পানী লিমিটেডৰ ভাৰপ্ৰাপ্ত সঞ্চালক হিচাপে নিযুক্তি লাভ কৰে । ১৯৭৭ চনত তেওঁক টাটা গ্ৰুপৰ ভিতৰত থকা বস্ত্ৰ কল এম্প্ৰেছ মিলছলৈ বদলি কৰা হয় । তেওঁৰ পৰিকল্পনা টাটাৰ আন কাৰ্যবাহীয়ে নাকচ কৰাৰ বাবে মিলটো বন্ধ কৰি দিয়ে । ১৯৯১ চনত জে আৰ ডি টাটাই টাটা ছন্সৰ অধ্যক্ষ পদৰ পৰা পদত্যাগ কৰি ৰতন টাটাক তেওঁৰ উত্তৰাধিকাৰী হিচাপে নিযুক্তি দিয়ে ৷