কোন কোন থাকিব নীতিশ কুমাৰৰ নতুন মন্ত্ৰীসভাত ?

Nitish Kumar Oath Ceremony: প্ৰায় ডেৰ বছৰৰ পাছত বিহাৰত এন ডি এৰ চৰকাৰ গঠন হ’বলৈ গৈ আছে ৷ নৱমবাৰৰ বাবে মুখ্যমন্ত্ৰীৰ শপত গ্ৰহণ কৰিব নীতিশ কুমাৰে । তেওঁৰ লগতে সম্ৰাট চৌধুৰী আৰু বিজয় সিনহায়ো উপ-মুখ্যমন্ত্ৰী হিচাপে শপত গ্ৰহণ কৰিব ।

নিউজ ডেস্ক, 28 জানুৱাৰী : ভাৰতীয় জনতা পাৰ্টি আৰু হিন্দুস্তানী আৱাম মৰ্চাৰ সহযোগত পুনৰবাৰ বিহাৰত চৰকাৰ গঠন কৰিবলৈ ওলাইছে নীতিশ কুমাৰে ৷ তেওঁৰ লগতে বিজেপি-জেডিইউ, হিন্দুস্তানী আৱাম মৰ্চা আৰু এজন নিৰ্দলীয় বিধায়কেও মন্ত্ৰী হিচাপে শপত গ্ৰহণ কৰিব ৷ ৰাজ্যপাল ৰাজেন্দ্ৰ বিশ্বনাথ আৰ্লেকাৰে ৰাজভৱনৰ ৰাজেন্দ্ৰ মণ্ডপত সকলোকে পদ আৰু গোপনীয়তাৰ শপত গ্ৰহণ কৰোৱাব ৷

নীতিশৰ বাহিৰেও 8 জনে মন্ত্ৰিত্ব লাভ কৰিব : আজি নীতিশ কুমাৰৰ লগত মুঠ 8 জনে মন্ত্ৰিত্ব লাভ কৰাৰ সম্ভাৱনা আছে ৷ ইয়াৰ ভিতৰত জেডিইউৰ কোটাৰ পৰা বিজয় কুমাৰ চৌধুৰী, বিজেন্দ্ৰ প্ৰসাদ যাদৱ আৰু শ্ৰৱণ কুমাৰ আছে ৷ একে সময়তে বিজেপিৰ পৰা উপ-মুখ্যমন্ত্ৰী হ’ব সম্ৰাট চৌধুৰী আৰু বিজয় সিনহা ৷ প্ৰেম কুমাৰৰ নামো চৰ্চাত আছে ৷

আৱাম মৰ্চা আৰু নিৰ্দলীয়ই পাব কেবিনেট পদ: ভাৰতীয় জনতা পাৰ্টি আৰু জনতা দল ইউনাইটেডৰ উপৰিও 4 বিধায়ক লৈ হিন্দুস্তানী আৱাম মৰ্চাইও মন্ত্ৰীসভাত স্থান লাভ কৰিব ৷ জিতন ৰাম মাঞ্জীৰ পুত্ৰ তথা হিন্দুস্তানী আৱাম মৰ্চাৰ সভাপতি সন্তোষ কুমাৰ সুমনেও মন্ত্ৰী হিচাপে শপত গ্ৰহণ কৰিব ৷ মন্ত্ৰীসভালৈ ঘূৰি আহিছে নিৰ্দলীয় বিধায়ক সুমিত কুমাৰ সিং ৷ আজি তেওঁ মন্ত্ৰী হিচাপে শপত গ্ৰহণ কৰিব ৷

নীতিশ কুমাৰক 128 জন বিধায়কৰ সমৰ্থন : 243 জনীয়া বিহাৰ বিধানসভাত এন ডি এৰ সংখ্যাগত শক্তি 128 ৷ য’ত জেডিইউৰ 45 জন বিধায়কৰ উপৰিও নীতিশ কুমাৰৰ সমৰ্থনত আছে 78 জন বিজেপি বিধায়ক, 4 জন হিন্দুস্তানী আৱাম মৰ্চাৰ বিধায়ক আৰু এজন নিৰ্দলীয় বিধায়ক ৷

উল্লেখ্য যে, ৰাজনৈতিক অস্থিৰতাৰ অন্ত পেলাই বিহাৰত নতুন চৰকাৰ গঠনৰ প্ৰস্তুতি আৰম্ভ হৈছে ৷ নীতিশ কুমাৰে ৰাজ্যপালৰ হাতত পদত্যাগ পত্ৰ দাখিল কৰাৰ পাচতে নতুন চৰকাৰ গঠনৰ প্ৰস্তুতি আৰম্ভ হৈছে ৷ ইতিমধ্যে বিজেপিয়ে নীতিশ কুমাৰৰ প্ৰতি সমৰ্থন আগবঢ়োৱাৰ কথা ঘোষণা কৰিছে ৷

লগতে পঢ়ক :বিহাৰত নতুন চৰকাৰ গঠনৰ প্ৰস্তুতি; মুখ্যমন্ত্ৰী হ’ব নীতিশ কুমাৰ