নেশ্যনেল ডেস্ক, ২৫ এপ্ৰিল : বিহাৰৰ পাটনাৰ মছৌৰীত দুৰ্বৃত্তৰ গুলীচালনা ৷ দুৰ্বৃত্তৰ গুলীত নিহত হয় জনতা দল ইউনাইটেড (জেডিইউ বা JDU)ৰ এজন নেতা ৷ নিহত JDU ৰ নেতাগৰাকী সৌৰভ কুমাৰ বুলি জানিব পৰা গৈছে ৷ বুধবাৰে নিশা পাটনাত এখন বিবাহ অনুষ্ঠানৰ পৰা উভতি অহাৰ সময়ত দুৰ্বৃত্তই গুলীয়াই হত্যা কৰে সৌৰভক ।
জানিব পৰা মতে, সৌৰভ কুমাৰৰ সৈতে আছিল আন এজন ব্যক্তি ৷ তেওঁৰ নাম মুনমুন কুমাৰ ৷ বুধবাৰে বিহাৰৰ পৰ্ছা বজাৰ গাঁৱত হোৱা গুলীচালনাত গুৰুতৰভাৱে আহত হয় মুনমুন ৷ পুনপুন আৰক্ষী থানাৰ ভাৰপ্ৰাপ্ত বিষয়া আৰ সিঙে এই কথা সদৰী কৰে ৷
আৰক্ষীয়ে উল্লেখ কৰা অনুসৰি, বাইকত অহা অচিনাক্ত চাৰি দুৰ্বৃত্তই সৌৰভৰ মূৰত কেবাবাৰো গুলীয়াই হত্যা কৰে ৷ ইয়াৰ বিপৰীতে তেওঁৰ সংগী মুনমুন কুমাৰক তিনিবাৰকৈ আঘাত কৰে দুৰ্বৃত্তৰ দলটোৱে । ঘটনা সংঘটিত হোৱাৰ পাচতে ততাতৈয়াকৈ চিকিৎসালয়লৈ লৈ যোৱা হয় যদিও সৌৰভক চিকিৎসকে মৃত বুলি ঘোষণা কৰে ৷ লগতে মুনমুনক গুৰুতৰ অৱস্থাত চিকিৎসালয়ত ভৰ্তি কৰোৱা হয় ।
ইফালে এই ঘটনাৰ পাচতে স্থানীয় ৰাইজৰ মাজত ভয়-ক্ষোভৰ সৃষ্টি হৈছে । জানিব পৰা মতে, বুধবাৰে নিশা প্ৰায় ১২ বজাত এখন বিয়াৰ অভ্যৰ্থনা অনুষ্ঠানৰ পৰা উভতি অহা সময়তে উক্ত ঘটনাটো সংঘটিত হৈছে ৷ আনহাতে, উক্ত ঘটনাৰ বিষয়ে জানিব পাৰি পুনপুন থানা আৰু পৰ্ছা থানাৰ আৰক্ষী সেই স্থানত উপস্থিত হৈ আৰম্ভ কৰে তদন্ত। অপৰাধীক শীঘ্ৰে গ্ৰেপ্তাৰ কৰি উচিত শাস্তি বিহিবলৈ আৰক্ষীক দাবী ৰাইজৰ ।
লগতে পঢ়ক :কালবুৰ্গীবাসীলৈ আৱেগিক আহ্বান মল্লিকাৰ্জুন খাৰ্গেৰ - Lok sabha election 2024
