গুৱাহাটী, ১৮ আগষ্ট:আজি পহিলা ভাদ । পহিলা ভাদ উপলক্ষে পুৱাৰে পৰা হৰি নামৰ ধ্বনিৰে মুখৰিত হৈ পৰিল ৰাজ্যৰ সত্ৰ-নামঘৰ । আজিৰে পৰা আৰম্ভ কৰি প্ৰায় এমাহজুৰি ভকত-বৈষ্ণৱ, আই-মাতৃসকলে হৰিনাম কীৰ্তনৰে মুখৰিত কৰি তুলিব ৰাজ্যৰ প্ৰতিখন সত্ৰৰ লগতে নামঘৰসমূহ । সমগ্ৰ ৰাজ্যৰ লগতে বেংগালুৰুতো দেখা গ'ল একেই এক ভক্তিমূলক পৰিৱেশ । বাংগালুৰুত অৱস্থিত অসমীয়াৰ একমাত্ৰ আধ্যাত্মিক অনুষ্ঠান বেংগালুৰুৰ নামঘৰতো সম্পূৰ্ণ নিয়ম-নীতিৰে পালন কৰা হ’ল পহিলা ভাদৰ দিনটো ।
প্ৰায় দুই শতাধিক ভক্তপ্ৰাণ লোকৰ উপস্থিতিত নাম-প্ৰসংগ, কীৰ্তন পাঠ দিহা নাম পৰিৱেশন কৰি ভক্তিৰসত বুৰ গ'ল ভিন্ন কাৰণত বেংগালুৰুত থকা প্ৰবাসী অসমীয়াসকল । নাম-কীৰ্তনৰ শেষত মাহ-প্ৰসাদ বিতৰণ আৰু সম্পূৰ্ণ থলুৱা সোৱাদেৰে ভোজ-ভাত অপ্যায়নো কৰা হয় । ইফালে বহিঃৰাজ্যত থাকিও বেংগালুৰুৰ দৰে এখন ব্যস্ত মহানগৰীত আমাৰ সাতাম পুৰুষীয়া ৰীতি-নীতি পালন কৰাটো অতি গৌৰৱৰ বিষয় হিচাপে বহুজনে মত প্ৰকাশ কৰিছে ।
আনহাতে চলিত মাহৰ ২৫ আৰু ২৬ আগষ্টত দুদিনীয়া কাৰ্যসূচীৰে বেংগালুৰুৰ নামঘৰত উদযাপন কৰা হ'ব শ্ৰী কৃষ্ণৰ জন্মাষ্টমী । সেই উপলক্ষে শ্ৰীমন্ত শঙ্কৰদেৱ সাংস্কৃতিক সমাজ, বাংগালুৰুৰ উপ-সভাপতি প্ৰণৱজ্যোতি বৰাই ৰাইজৰ সহায়-সহযোগিতাৰ লগতে উপস্থিতি আন্তৰিকতাৰে আহ্বান জনাইছে ।