নেশ্যনেল ডেস্ক, 8 জুলাই: আস্থা ভোটত জয়লাভ কৰিছে হেমন্ত ছোৰেন চৰকাৰে । বিধানসভাৰ বিশেষ অধিৱেশনৰ সময়ত হেমন্ত ছোৰেনে সদনত আস্থা প্ৰস্তাৱ আগবঢ়ায় । আলোচনাৰ অন্তত হেমন্ত ছোৰেন চৰকাৰে সহজেই ভোটদানত জয়লাভ কৰে । এই প্ৰস্তাৱৰ সপক্ষে মুঠ 45 টা ভোটদান হোৱাৰ বিপৰীতে বিৰোধীয়ে এটাও ভোট পোৱা নাছিল ।
সদনত আস্থা প্ৰস্তাৱ সন্দৰ্ভত আলোচনাৰ অন্তত ভোটগ্ৰহণ কৰা হয় । ভোটদানৰ সময়তো ধাৰাবাহিকভাৱে হুলস্থুলীয়া পৰিৱেশৰ সৃষ্টি হৈছিল । হুলস্থুলৰ মাজতে ভোটগণনা কৰা হয় । ইফালে, এন ডি এৰ বিধায়কসকলে সদনৰ পৰা ওলাই আহিল । ভোটদানত অংশ লোৱা নাছিল এন ডি এৰ বিধায়কসকলে । ইয়াৰ বাবেই এই প্ৰস্তাৱৰ বিৰুদ্ধে এটাও ভোট নপৰিল । আনহাতে নিৰ্দলীয় বিধায়ক সৰযু ৰায় নিৰপেক্ষ হৈ থাকিল । ভোটদানৰ অন্তত বিধানসভাৰ কাম-কাজ অনিৰ্দিষ্টকাললৈ স্থগিত ৰখা হয় ।
পঞ্চমখন বিধানসভাৰ অধিৱেশনত চতুৰ্থবাৰৰ বাবে ভাৰতীয় মিত্ৰজোঁটৰ চৰকাৰে আস্থা প্ৰস্তাৱ উত্থাপন কৰে । তৃতীয়বাৰৰ বাবে ৰাজ্যৰ মুখ্যমন্ত্ৰীৰ পদ গ্ৰহণ কৰিলে হেমন্ত ছোৰেনে । 4 জুলাইত তৃতীয়বাৰৰ বাবে মুখ্যমন্ত্ৰী হিচাপে শপত গ্ৰহণ কৰে । সোমবাৰে বিধানসভাৰ বিশেষ অধিৱেশন আহ্বান কৰি সদনত আস্থা প্ৰস্তাৱ দাখিল কৰা হয় । কাৰণ হেমন্ত ছোৰেনে অকলেই মুখ্যমন্ত্ৰী হিচাপে শপত গ্ৰহণ কৰিছিল, সেয়েহে তেওঁ নিজেই আস্থা প্ৰস্তাৱ সদনত উত্থাপন কৰিছিল ।