ভুৱনেশ্বৰ : সাগৰীয় ঘূৰ্ণীবতাহ 'ডানা' প্ৰভাৱ ইতিমধ্যে উপকূলীয় ৰাজ্য ওড়িশা আৰু পশ্চিমবংগত দেখিবলৈ পোৱা গৈছে । বুধবাৰে সন্ধিয়াৰ পৰা ঘূৰ্ণীবতাহ 'ডানা'ৰ ফলত ওড়িশাৰ ১১ খন জিলাত মধ্যমীয়াৰ পৰা ধাৰাসাৰ বৰষুণ আৰম্ভ হৈছে ।
ওড়িশাত ডানাৰ প্ৰভাৱ
ভাৰতীয় বতৰ বিজ্ঞান বিভাগে এই সন্দৰ্ভত আগজাননী দি কয় যে ২৪ অক্টোবৰৰ মাজনিশাৰ পৰা ২৫ অক্টোবৰলৈ পুৰী আৰু সাগৰ দ্বীপৰ মাজৰ উত্তৰ ওড়িশা আৰু পশ্চিমবংগ উপকূল অতিক্ৰম কৰাৰ সম্ভাৱনা আছে ।
আইএমডিয়ে কয়, "কেন্দ্ৰীয় আৰু কাষৰীয়া উত্তৰ-পশ্চিম বংগোপসাগৰৰ ওপৰত সৃষ্টি হোৱা তীব্ৰ ঘূৰ্ণীবতাহ 'ডানা' যোৱা ৬ ঘণ্টাত ১২ কিলোমিটাৰ প্ৰতি ঘণ্টাৰ গতিবেগত উত্তৰ-উত্তৰ-পশ্চিম দিশে আগবাঢ়িছে । ধামৰা (ওড়িশাৰ)ৰ পৰা ২৯০ কিলোমিটাৰ দক্ষিণ-দক্ষিণ-পূব আৰু সাগৰ দ্বীপৰ (পশ্চিমবংগ) পৰা ৩৫০ কিলোমিটাৰ দক্ষিণে গতি কৰিছে ।" বতৰ বিজ্ঞান কেন্দ্ৰ ভুৱনেশ্বৰে বিশেষ বতৰ বুলেটিনত ঘূৰ্ণীবতাহ ডানাৰ সম্ভাৱ্য বতাহৰ গতিবেগ উত্থাপন কৰিছে ।
সংবাদ মাধ্যমৰ সন্মুখত ভুৱনেশ্বৰৰ আঞ্চলিক বতৰ কেন্দ্ৰৰ সঞ্চালক ড৹ মনোৰমা মোহান্তিয়ে বৃহস্পতিবাৰে কয় যে কিছুমান স্থানত প্ৰৱলৰ পৰা অতি প্ৰৱল বৰষুণ আৰম্ভ হৈছে । আনহাতে ভদ্ৰক জিলাৰ চান্দবালীত ৪৬.২ মিঃমিঃ, পাৰাদীপত ৬২.৯ মিঃমিঃ, জগতসিংপুৰত ২৭ মিঃমিঃ, কেন্দ্ৰপাৰাৰ ৰাজকণিকাত ২৭ মিঃমিঃ, বালাচোৰৰ নীলাগিৰিত ২৭ মিঃমিঃ আৰু ময়ূৰভঞ্জৰ বেটনোটিত এতিয়ালৈকে ১৯ মিঃমিঃ বৰষুণ হৈছে । সময়ৰ লগে লগে বৰষুণৰ পৰিমাণ বৃদ্ধি হোৱাৰ সম্ভাৱনা আছে ।
কেন্দ্ৰপদ আৰু ভদ্ৰকত বতাহৰ গতিবেগ প্ৰতি ঘণ্টাত ১০০-১১০ কিঃমিঃৰ পৰা ১২০ কিঃমিঃ লৈ হোৱাৰ সম্ভাৱনা আছে । তেওঁ উল্লেখ কৰা মতে ময়ূৰভঞ্জ, জগতসিংপুৰ, জাজপুৰ আৰু কটকত বতাহৰ গতিবেগ প্ৰতি ঘণ্টাত প্ৰায় ৮০-৯০ কিঃমিঃ হ'ব । আনহাতে পুৰী, খুৰ্দা, ঢেঙ্কানাল আৰু কেওনঝাৰ জিলাত ৬৭-৭০ কিঃমিঃ/ঘণ্টা হ'ব । ময়ূৰভঞ্জ, বালাচোৰ, কেন্দ্ৰপদ আৰু ভদ্ৰক ২৪ আৰু ২৫ অক্টোবৰৰ বাবে ৰেড এলাৰ্ট জাৰি কৰা হৈছে ।