নিউজ ডেস্ক, 4 অক্টোবৰ: মণিপুৰত হিংসাৰ জুইকুৰা এতিয়াও যেন উমি উমি জ্বলি আছে ৷ একাংশই আন্ধাৰত থাকি এতিয়াও অভিসন্ধি ৰচি আহিছে উত্তৰ-পূবৰ ৰাজ্যখন অশান্ত কৰি ৰখাৰ ৷ নিৰাপত্তাৰক্ষীৰ অভিযানত সঘনে ৰাজ্যখনৰ ভিন্ন স্থানৰ পৰা অস্ত্ৰ-শস্ত্ৰ উদ্ধাৰ হোৱা ঘটনাই যেন তাকেই প্ৰমাণ কৰিছে ৷ শেহতীয়া কেইটামান দিনত মণিপুৰত কোনো আক্ৰমণৰ ঘটনা সংঘটিত হোৱা নাই যদিও নিৰাপত্তাৰক্ষীয়ে নিয়মীয়াকৈ অস্ত্ৰ-শস্ত্ৰ উদ্ধাৰ কৰি আহিছে ৷
আছাম ৰাইফলছৰ এটা অভিযানকাৰী দলে চোৰাংচোৱা তথ্যৰ ভিত্তিত চলোৱা এক অভিযানত অস্ত্ৰ-শস্ত্ৰৰ লগতে উদ্ধাৰ কৰিছে আন কেতবোৰ যুদ্ধত বা আক্ৰমণত ব্যৱহাৰ কৰিব পৰা সামগ্ৰী ৷ মণিপুৰৰ টেংগনৌপাল জিলাত উদ্ধাৰ হৈছে এই অস্ত্ৰ ভাণ্ডাৰ ৷ যোৱা 1 অক্টোবৰত ছেনাম জিলাৰ এটা অঞ্চলত এই অভিযান চলোৱা বুলি জানিব পৰা গৈছে ৷
আছাম ৰাইফলছৰ হেডকোৱাৰ্টাৰ পৰা প্ৰকাশ কৰা এক বিবৃতিত মহাপৰিদৰ্শকে (দক্ষিণ) কয়, ‘‘টেংগনৌপাল জিলাৰ ছেনাম গাঁৱৰ এটা অঞ্চলত বৃহৎ পৰিমাণৰ অস্ত্ৰ, গোলা-বাৰুদ আৰু অন্যান্য বিস্ফোৰক মজুত ৰখাৰ খবৰ লাভ কৰাৰ পিচত আছাম ৰাইফলছে বিস্ফোৰক ডিটেক্টৰ আৰু কুকুৰৰ সহায়ত এক অভিযান চলায় ৷ 1 অক্টোবৰত চলোৱা এই অভিযানত 15 টা ডাঙৰ আই ই ডি, 42 টা দেশত নিৰ্মিত গ্ৰেণেড, আগ্নেয়াস্ত্ৰ আৰু গোলা-বাৰুদ জব্দ কৰা হয় ৷’’