নেশ্যনেল ডেস্ক,২০ আগষ্ট:সময়ত মানুহেও লগ এৰে । কিন্তু শেষলৈকে ৰৈ থাকে আপোন জীৱ-জন্তু । গৰাকীৰ প্ৰতি কুকুৰৰ আনুগত্যৰ কথা সকলোৱে জানে । যিকোনো পৰিস্থিতিতে লগ নেৰে কুকুৰে । তাকেই যেন পুনৰ প্ৰমাণ কৰিলে এটা কুকুৰে । গৰাকীৰ মৃত্যু হোৱাৰ পিছতো চাৰি মাহে চিকিৎসালয়ৰ সন্মুখত অপেক্ষাৰত হৈ থাকিল এটা পোহনীয়া কুকুৰ । কেৰেলাৰ কন্নুৰৰ শিৱমোগাত দেখা গ'ল এই দৃশ্য ।
কুকুৰটোৰ গৰাকীৰ শাৰীৰিক অসুস্থতাৰ বাবে ভৰ্তি কৰোৱা হৈছিল কেৰালাৰ কান্নুৰৰ চিকিৎসালয়ত । কিন্তু দুৰ্ভাগ্যবশত চিকিৎসালয়তে প্ৰাণ হেৰুৱাই লোকজনে । তেওঁৰ মৃত্যুৰ চাৰিমাহ পাৰ হৈ গ'ল । কিন্তু মালিকক লগ পোৱাৰ অপেক্ষাত কুকুৰটোৱে প্ৰতিদিনেই আহি অপেক্ষাৰত হৈ ৰ'ল চিকিৎসালয়ৰ সন্মুখত । শিৱমোগা জিলাৰ হোলেহোন্নুৰ চহৰত এই দৃশ্য দেখি চকু সেমেকিছে সকলোৰে ।
চিকিৎসালয়ৰ কৰ্মচাৰীসকলে জনোৱা অনুসৰি মৃত লোকজনে প্ৰতিদিনে চিকিৎসালয়লৈ আহোতে লগত লৈ আহিছিল কুকুৰটোক । সেয়ে মালিকক বিচাৰি কুকুৰটো এতিয়াও ৰৈ থাকে চিকিৎসালয়খনৰ সন্মুখত । প্ৰথমে চিকিৎসালয়ৰ কৰ্মচাৰীসকলে কুকুৰটোক পথৰ কাষৰ কুকুৰ বুলি চিকিৎসালয়খনৰ পৰা খেদি পঠিয়াইছিল । তথাপিও, কুকুৰটোৱে চিকিৎসালয়ৰ সন্মুখত থিয় হৈ চিকিৎসালয়লৈ অহা ৰোগীসকলৰ ওচৰত ঘূৰি ফুৰিছিল । ইয়াকে লৈ আন আন ৰোগীসকলে অসন্তুষ্টিও প্ৰকাশ কৰিছিল । সেয়েহে, কুকুৰটো প্ৰতিদিনে চিকিৎসালয়ৰ ভিতৰলৈ আহিছিল আৰু ভুকিছিল । পিছত স্থানীয় লোকসকলৰ সৈতে সোধা-পোছা কৰাত গোটেই ঘটনাটো পোহৰলৈ আহিছিল ।