ছবছৰীয়া শিশুৱে আৰোহন কৰিলে এভাৰেষ্ট বিলাসপুৰ(হিমাচল প্ৰদেশ), 26 এপ্ৰিল: ‘বয়স কেৱল এটা সংখ্যা’- বৃদ্ধ লোকসকলৰ প্ৰতি প্ৰায়েই এই কথা কোৱা হয় যেতিয়া তেওঁলোকে তেওঁলোকতকৈ সৰু বয়সৰ লোকৰ সন্মুখত আশ্চৰ্যজনক কিবা এটা কৰি দেখুৱায় ৷ কিন্তু কেতিয়াবা অতি সৰু ল’ৰা-ছোৱালীয়েও এনে কাম কৰে । তেওঁলোকে এনে কাৰ্য সম্পাদন কৰে, যিয়ে সকলোকে আচৰিত কৰি তোলে ।
যদিহে এটি শিশুৱে সঠিক সময়ত সঠিক নিৰ্দেশনা লাভ কৰে, তেতিয়া তেওঁলোকে সফলতাৰ শিখৰ চুবলৈ সক্ষম হয় ৷ হিমাচল প্ৰদেশৰ ছয় বছৰীয়া য়ুভানৰ বিষয়ে জানিলেও আপুনি ক’ব যে বয়স মাত্ৰ এটা সংখ্যাহে । যুভানে মাত্ৰ ছয় বছৰ বয়সতে যি কৰিলে, সেয়া প্ৰাপ্তবয়স্কসকলৰ বাবেও সহজ নহয় ৷
দৰাচলতে, হিমাচল প্ৰদেশৰ বিলাসপুৰ জিলাৰ ছয় বছৰীয়া য়ুভানে বিশ্বৰ সৰ্বোচ্চ শৃংগ মাউণ্ট এভাৰেষ্টৰ বেছ কেম্পত উপস্থিত হৈ দেশৰ পতাকা উত্তোলন কৰিবলৈ সক্ষম হয় । উল্লেখযোগ্য যে পৃথিৱীৰ সৰ্বোচ্চ শৃংগ মাউণ্ট এভাৰেষ্টৰ উচ্চতা প্ৰায় ৮,৮৪৮ মিটাৰ । আনহাতে এভাৰেষ্ট বেছ শিবিৰৰ উচ্চতা 5,364 মিটাৰ । এইক্ষেত্ৰত, এইটো বিশ্বৰ সৰ্বোচ্চ বেছ শিবিৰ ৷ -15 ডিগ্ৰী উষ্ণতাত অক্সিজেনৰ অভাৱৰ ফলত যিকোনো লোকৰে সমস্যা হয় । ইমান উচ্চতাত ট্ৰেকিং কৰাটো শ্ৰেষ্ঠ ট্ৰেকাৰসকলৰ বাবেও এটা কঠিন কাম ৷ কিন্তু, ছয় বছৰীয়া য়ুভান এভাৰেষ্টৰ বেছ শিবিৰত উপস্থিত হোৱাৰ পিচত ত্ৰিৰংগা উত্তোলন কৰিবলৈ সক্ষম হ’ল ৷ ফটো, ভিডিঅ’সমূহ প্ৰত্যক্ষ কৰি সকলোৱে তেওঁৰ কৃতিত্বক অভিবাদন জনাইছে ।
মাউণ্ট এভাৰেষ্ট বেছ কেম্পত উপস্থিত হোৱাৰ পূৰ্বে য়ুভানে ছয় মাহৰ কঠোৰ প্ৰশিক্ষণ ল’বলগীয়া হৈছিল । ইয়াৰ পিচতে ছয় বছৰীয়া য়ুভানে পৃথিৱীৰ সৰ্বোচ্চ বেছ কেম্পটোলৈ যাত্ৰা আৰম্ভ কৰিছিল ।
ছয় বছৰীয়া য়ুভানে তেওঁৰ পিতৃ-মাতৃৰ সৈতে এই অত্যন্ত কঠিন ট্ৰেকিং সম্পূৰ্ণ কৰে আৰু মাউণ্ট এভাৰেষ্ট বেছ কেম্প জয় কৰে । য়ুভানে তেওঁৰ দেউতাক সুভাষ চন্দ্ৰ আৰু তেওঁৰ মাতৃ দিব্যা ভাৰতীৰ সৈতে এই যাত্ৰা সম্পূৰ্ণ কৰে । উল্লেখ্য যে হিমাচল প্ৰদেশৰ য়ুভান বৰ্তমান পিতৃ-মাতৃৰ সৈতে ডুবাইত বাস কৰে ।
য়ুভানৰ পিতৃ সুভাষ চন্দ্ৰই কয়, ‘‘আমাৰ যাত্ৰা ডুবাইৰ পৰা আৰম্ভ হৈছিল আৰু আমি প্ৰথমে কাঠমাণ্ডুত উপস্থিত হৈছিলো । একাংশ বন্ধুৰ সৈতে আমি কাঠমাণ্ডুৰ লুকলা বিমানবন্দৰলৈ বিমানত উঠিছিলো । ইয়াৰ পিচত আমি 8 এপ্ৰিলত গাইডৰ সৈতে ভ্ৰমণ কৰিছিলো । ইয়াৰ 11 দিনৰ ভিতৰত আমি এভাৰেষ্টৰ বেছ কেম্পলৈ যাত্ৰা আৰম্ভ কৰিছিলো আৰু গাইডৰ নিৰ্দেশনা অনুসৰি মুঠ আঠদিন যাত্ৰা কৰিছিলো আৰু জিৰণি লৈছিলো । সমগ্ৰ যাত্ৰাকাল আমি উপভোগ কৰিছিলো ৷ আমি আশা কৰো যে য়ুভানৰ এই পদক্ষেপে শিশুসকলক প্ৰকৃতিৰ প্ৰতি আকৰ্ষিত কৰিব ।’’
উল্লেখ্য যে য়ুভানৰ পিতৃ সুভাষ চন্দ্ৰই ডুবাইৰ এটা ব্যক্তিগত প্ৰতিষ্ঠানত কাম কৰে ৷ তেওঁৰ পুত্ৰ য়ুভানৰ বয়স বৰ্তমান ছয় বছৰ আৰু তেওঁ প্ৰথম শ্ৰেণীৰ ছাত্ৰ । সুভাষে কয় যে পৰ্বতাৰোহণৰ বাবে তেওঁ কোনো বিশ্ৰাম নোহোৱাকৈ ছয় মাহৰ বাবে য়ুভানক প্ৰশিক্ষণ প্ৰদান কৰিছিল । য়ুভানৰ দেউতাকে লগতে কয় যে তেওঁ য়ুভানক সাঁতোৰ, সমৰ কলা আৰু দৌৰৰ প্ৰশিক্ষণ দিছিল । ফলত য়ুভান এতিয়া কেৱল এজন ভাল ট্ৰেকাৰেই নহয়, বৰঞ্চ এজন ভাল সাঁতোৰবিদ, দৌৰবিদ আৰু সমৰ কলাৰ বিশেষজ্ঞ হৈ পৰা বুলিও পিতৃয়ে উল্লেখ কৰে ।
লগতে পঢ়ক:ওলোমা দলং মেৰামতিত নিজেই হাতে-কামে লাগি গ'ল আৰক্ষী অধীক্ষক
লগতে পঢ়ক:কাশ্মীৰত সেনা আৰু সন্ত্ৰাসবাদীৰ মাজত সংঘৰ্ষ; দুজনকৈ অচিনাক্ত সন্ত্ৰাসবাদী নিহত
