مغربی بنگال کے بیربھوم ضلع کے بولپور میں وزیراعلی ممتا بنرجی نے پیدل روڈ شو کے اختتام پر عوامی جلسے سے خطاب کیا۔
دوران تقریر ممتا بنرجی نے وزیراعظم نریندر مودی اور مرکزی وزیر داخلہ امت شاہ سمیت دیگر کا نام لیے بغیر جم کر تنقید کی۔
ممتا نے کہا کہ سفید داڑھی رکھ لینے سے کوئی رابندر ناتھ ٹیگور نہیں بن جائے گا۔ رابندرناتھ ٹیگور ایک عظیم شخصیت ہیں۔ ان کا کسی سے کوئی مقابلہ نہیں ہو سکتا ہے۔
انہوں نے کہا کہ 'رابندر ناتھ ٹیگور عظیم تھے اور عظیم رہیں گے۔ ان کی نقل کرنے والوں سے ہوشیار رہنے کی ضرورت ہے ورنہ پریشانی ہو سکتی ہے۔
ممتا بنرجی نے کہا کہ تقریر ایسی ہوتی ہے جسے سن کر لوگ سوچنے پر مجبور ہو جاتے ہیں لیکن لوگ حقیقت سے بھی اچھی طرح سے واقف ہو چکے ہیں۔ اسی وجہ سے بنگال کی عوام پر ان کی باتوں کا کوئی اثر نہیں پڑتا۔ بنگال کی عوام مثالی ہے اور اسمبلی انتخابات میں اس کی غیر معمولی مثال مل جائے گی۔
خطاب کے دوران ممتا بنرجی نے کہا کہ 'گزشتہ ایک مہینے سے کسان کُھلے آسمان کے نیچے احتجاج کر رہے ہیں لیکن ان سے کسی کو ملاقات کرنے کی فرصت نہیں ملی لیکن تقریر ضرور سامنے آ جاتی ہے۔
