پارٹی چھوڑ کر جانے والوں سے آج پردیش کانگریس کمیٹی نے واپس لانے کی کوشش شروع کر دی ہے. 2011 میں ریاست میں اقتدار کی تبدیلی کے بعد سے کانگریس ورکروں کی بڑی تعداد پارٹی سے قطع تعلق کر چکی ہے۔
ایم ایل اے، ایم پی اور ورکر ترنمول کانگریس میں شامل ہوگئے۔ اس کو کانگریس نے مد نظر رکھتے ہوئے پردیش کانگریس میں تبدیلی کرتے ہوئے ریاستی صدر ادھیر چودھری کو ہٹا دیا ہے۔
سومن مترا کو ذمہ داری دی گئی لیکن حالات میں کوئی تبدیلی نہیں ہوئی۔ کانگریس کے ایم پی پردیپ بھٹاچاریہ نے آج کہا کہ جو لوگ پارٹی چھوڑ کر چلے گئے ہیں ۔ وہ پارٹی میں واپس آ جائیں الیکشن میں امیدوار بنیں اور پارٹی کی سرگرمیوں میں حصہ لیں۔ پرانے ورکروں کا پارٹی میں خیر مقدم ہے۔ ملک کی موجودہ صورت حال میں کانگریس اور بایاں محاذ ہی ترنمول کانگریس اور بی جے پی کے خلاف متبادل طاقت بن سکتی ہے۔
وہیں بایاں محاذ اور کانگریس اتحاد کو پارٹی کے کئی رہنما قبول نہیں کر رہے۔ اس،سلسلے میں انہوں نے کہا کہ موجودہ حالات میں بایاں محاذ کی اتحاد کے علاوہ ہمارے پاس کوئی چارہ نہیں ہے ۔
کانگریس کے صدر دفتر میں پارٹی کے پرانے ورکروں کو واپس لانے کا کام شروع ہو چکا ہے۔
