مغربی بنگال میں گزشتہ چند مہینوں کے دوران جرائم کے گراف میں زبردست اضافہ ہوا ہے جس کے سبب ریاست کے لا اینڈ آرڈر پر سوال اٹھنے لگے ہیں۔ ریاست مغربی بنگال کے دو اضلاع میں چوبیس گھنٹوں کے دوران اجتماعی جنسی زیادتی کا دوسرا واقعہ پیش آیا۔ اس کے بعد اپوزیشن جماعتوں نے حکمراں جماعت ترنمول کانگریس کو ریاست کے بیشتر اضلاع میں جرائم کے گراف میں اضافہ کے لئے ذمہ دار قرار دیا۔
ندیا ضلع کے ہاش کھالی علاقے میں ہوئے اجتماعی جنسی زیادتی کے واقعہ میں ترنمول کانگریس رہنما کے بیٹے کی گرفتاری عمل میں آئی ہے۔ مزید تحقیقات جاری ہے اسی درمیان جنوبی 24 پرگنہ کے نام خانہ تھانہ علاقے میں اجتماعی جنسی زیادتی کا واقعہ پیش آیا۔ مغربی بنگال پردیش کانگریس کے صدر ادھیر رنجن چودھری نے کہا کہ اس میں کوئی دو رائے نہیں ہے کہ مغربی بنگال میں ہاتھرس جیسے واقعہ اکثر و بیشتر رونما ہوتے رہتے ہیں۔
انہوں نے کہا کہ فرق صرف اتنا ہی ہے کہ ہاتھرس کے واقعے کو لوگوں نے ٹیلی ویژن پر دیکھا لیکن مغربی بنگال میں اس طرح کے واقعے پیش آنے کے باوجود کسی کو کچھ پتہ نہیں چلتا ہے۔ ان کا کہنا ہے کہ حیرت کی بات یہ ہے کہ ترنمول کانگریس کے رہنما پہلے جنسی زیادتی کے واقعے کی مذمت کرتے ہیں اور پھر قصور واروں کی حماعت میں آواز بلند کرنے لگتے ہیں۔
