مغربی بنگال میں دوارے سرکار کیمپ کا انعقاد

وزیراعلیٰ ممتا بنرجی کی ہدایت پر دو مہینوں کے بعد ریاست کے تمام اضلاع میں دوارے سرکار کیمپ کا سلسلہ شروع ہو گیا ہے جہاں عوام کو مختلف ترقیاتی منصوبوں سے جوڑا جارہا ہے۔

مغربی بنگال میں ترقیاتی منصوبوں سے عوام کو جوڑنے کے لئے ریاستی حکومت کی جانب سے دوارے سرکار کیمپ کے انعقاد کا سلسلہ دوبارہ سے شروع کیا گیا ہے۔

دارالحکومت کولکاتا سمیت ریاست کے مختلف اضلاع میں دوارے سرکار اسکیم کے تحت تمام لوگوں کو ترقیاتی منصوبوں سے جوڑنے کا کام تیزی سے شروع ہوا ہے۔

ریاست کے دوسرے اضلاع کی طرح ہوڑہ میں بھی دوارے سرکار کیمپ کا انعقاد کیا گیا، جس میں سواستاساتھی کارڈ بنوانے والے لوگوں کی تعداد سب سے زیادہ ہے۔

دوارے سرکار کیمپ میں آنے والے لوگوں سے ای ٹی وی بھارت کے نمائندہ نے بات کی تو انہوں نے بتایا کہ سواستاساتھی کارڈ ریاستی حکومت کے تمام ترقیاتی منصوبوں میں سے ایک ہے۔

انہوں نے کہا کہ اس کارڈ میں پانچ لاکھ روپے کا ہیلتھ انسورنش حکومت کی جانب سے لوگوں کو دیا جارہا ہے، اس کی مدد سے غریب کہیں بھی کسی بھی وقت بڑے ہسپتال میں علاج کروا سکتا ہے۔

دوارے سرکار کیمپ میں آنے والی ایک خاتون کا کہنا ہے کہ سواستاساتھی کارڈ در اصل مصیبتوں میں کام آنے والا کارڈ ہے، شروعات میں مختلف ہسپتالوں میں اس کارڈ کو تسلیم نہیں کیا جاتا تھا لیکن اب سب ٹھیک ہو گیا ہے۔


انہوں نے کہا کہ ان کے کئی رشتہ داروں نے اسی کارڈ سے بڑے ہسپتال میں علاج کروائے ہیں۔ ان کے خیال سے سب کو کارڈ بنوانا چاہیے۔