مغربی بنگال کے مدنی پور ضلع کے ہلدیہ میں عوامی جلسے کو خطاب کرتے ہوئے وزیراعظم نریندر مودی نے وزیراعلیٰ ممتا بنرجی اور یہاں کی سیاسی جماعتوں پر جم کر تنقید کی۔
انہوں نے کہا کہ بنگال کی موجودہ حالت اور غربت کے لئے وزیراعلیٰ ممتا بنرجی اور یہاں کی سیاست ذمہ دار ہے۔
وزیراعظم نریندر مودی کا کہنا ہے کہ اس میں کوئی شک نہیں ہے کہ مغربی بنگال میں گزشتہ کئی دہائیوں سے ترقی رک گئی ہے۔
انہوں نے کہا کہ بائیں محاذ کے دور اقتدار کے دوران ترقیاتی کاموں پر گرہن لگے ہوئے تھے، اس وقت حکومت نے عوام کو ترقی سے دوررکھا۔ بائیں محاذ کے دور کے خاتمے کے بعد ممتا بنرجی اقتدار میں آئیں لیکن عوام کو مایوس کیا۔
نریندر مودی نے کہا کہ ممتا بنرجی اور ان کی پارٹی ترنمول کانگریس لیفٹ فرنٹ کی دوسری شکل ہے۔ ان کے دور اقتدار میں لیفٹ کی طاقتیں بڑھیں، تبدیلی اقتدار کا مطلب کیا ہوا؟ ممتا بنرجی ہی اس کی وضاحت کر سکتی ہیں۔
انہوں نے کہا کہ بنگال کے عوام آج ممتا بنرجی سے یہ جاننا چاہتے ہیں کہ ان کے دور اقتدار میں بدعنوانی کے معاملات میں اضافہ کیسے ہوا؟ کسی بھی ملک اور ریاست کی ترقی میں بدعنوانی سے بڑی رکاوٹ ہوتی ہے۔
وزیراعظم نریندر مودی کا کہنا ہے کہ ترنمول کانگریس کی سربراہ ممتا بنرجی ملک کو نقصان پہنچانے والوں کی زبان میں باتیں کرتی ہیں۔ اسی وجہ سے بنگال کے عوام ایک بار تبدیلی کے لئے ووٹ ڈالیں گے۔
مدنی پور میں عوامی جلسے سے خطاب کرتے ہوئے وزیراعظم نریندر مودی نے کہا کہ ترنمول کانگریس، لیفٹ فرنٹ اور کانگریس تینوں اپنی اپنی پوری طاقت جھونک دی، اس کے باوجود بی جے پی کو مغربی بنگال میں حکومت بنانے سے کوئی روک نہیں سکتا ہے۔
انہوں نے کہا کہ ہماری حکومت بنتی ہے تو ریاست کے عوام کو تمام ترقیاتی منصوبوں کے فائدے دلائیں گے جسے ممتا بنرجی کی حکومت نے روک رکھا ہے۔
وزیراعظم نریندر مودی کا کہنا ہے کہ بنگال کے کسانوں کی قسمت بدلنے کی کوشش کریں گے۔ بنگال کے کسانوں کو بنیادی ترقی سے محروم رکھا گیا ہے، ممتا بنرجی کو اس کا جواب دینا پڑے گا۔
واضح رہے کہ اسمبلی انتخابات کے مدنظر وزیراعظم نریندر مودی نے پہلے سیاسی جلسے کو خطاب کیا ہے۔ گزشتہ دو ہفتوں کے دوران وزیراعظم کا یہ دوسرا دورہ ہے۔
