مغربی بنگال کی وزیر اعلیٰ ممتا بنرجی نے حال ہی میں ہوئے ضمنی انتخابات میں ترنمول کانگریس کے چاروں فاتح امیدواروں کو مبارکباد دیتے ہوئے کہا ہے کہ نتائج سے ظاہر ہوتا ہے کہ بنگال ہمیشہ ’پروپیگنڈہ اور نفرت کی سیاست‘ کی جگہ ترقی اور اتحاد کا انتخاب کرے گا۔
محترمہ بنرجی نے ٹویٹر پر کہا،’میری تمام چاروں فاتح امیدواروں کو دلی مبارکباد۔ یہ جیت عوام کی جیت ہےکیونکہ اس سے ظاہر ہوتا ہے کہ بنگال کس طرح ہمیشہ پروپیگنڈے اور نفرت کی سیاست کے بجائے ترقی اور اتحاد کا انتخاب کرے گا‘۔
انہوں نے دہرایا،’عوام کے ’آشیرواد‘ سے، ہم بنگال کو مزید بلندیوں پر لے جانے کا وعدہ کرتے ہیں‘۔
پارٹی نے چاروں اسمبلی حلقوں گوسابہ، کھردہ، دنہاٹا اور شانتی پور میں کامیابی حاصل کی ہے۔
واضح رہے کہ مغربی بنگال کی حکمراں جماعت ترنمول کانگریس نے چار اسمبلی حلقوں میں ہوئے ضمنی انتخابات میں غیر معمولی جیت درج کی۔
حکمراں جماعت ترنمول کانگریس کو چار میں سے دو سیٹوں پر ایک ایک لاکھ سے زائد ووٹوں سے جیت ملی ہے جبکہ ایک سیٹ پر ایک لاکھ کے قریب اور ایک پر پچاس ہزار سے زائد ووٹوں سے کامیابی ملی ہے۔
ضمنی انتخابات میں ممتا بنرجی کی قیادت والی حکمراں جماعت ترنمول کانگریس کو 76 فیصد سے زائد ووٹ ملے، بی جے پی کو 17 فیصد جبکہ سی پی آئی ایم سمیت دوسری سیاسی جماعتوں کو سات فیصد ووٹ ملے۔
