شہریت ترمیمی ایکٹ کے خلاف ریاست بھر میں جاری احتجاج کے دوران تشدد کے واقعات کی وجہ سے حکومت نےمغربی بنگال کے اضلاع مرشدآباد، مالدہ، جنوبی 24پرگنہ،شمالی24پرگنہ، شمالی دیناج پور،ہوڑہ اور دیگر علاقوں میں انٹر نیٹ سروس بند کردیا تھا۔اب حکومت نے ہوڑہ اور شمالی 24پرگنہ میں انٹر نیٹ سروس بحال کردیا ہے۔
ریاستی سیکریٹ کے ذرائع کے مطابق جن علاقوں میں حالات معمول پر آگئے ہیں وہاں انٹر نیٹ سروس کو بحال کردیا گیا ہے۔تاہم اب تک مالدہ، مرشدآباد اور شمالی دیناج پور میں انٹر نیٹ سروس کو بحال نہیں کیا گیا ہے۔
گزشتہ جمعہ سے ہی بنگال بھر میں احتجاج اور مظاہرے ہورہے ہیں۔اس دوران بعض علاقوں میں تشدد کے واقعات کی وجہ سے کئی اضلاع میں انٹر نیٹ سروس کو بند کردیا گیا تھا۔
واضح رہے کہ پارلیمنٹ کے دونوں ایوانوں میں شہریت ترمیمی ایکٹ منظور ہونے کےبعد ملک کی دیگر ریاستوں کی طرح مغربی بنگال میں احتجاج کاسلسلہ جاری ہے۔
ریاست کے مختلف اضلاع میں احتجاج کے دوران لوگوں نے ریلوے سمیت دیگر سرکاری املاک کو نقصان پہنچانے کی کوشش کی ہے۔
مسلسل احتجاج کے سبب مشرقی ریلوے نے ہوڑہ اور سیالدہ سے روانہ ہونےو الی متعدد ٹرینوں کو معطل کرنے کا اعلان کیا ہے۔
