بنگال کی فکر چھوڑ کر بی جے پی ملک کو سونار بھارت بنائے: ابھیشک بنرجی

رکن پارلیمان ابھیشک بنرجی نے آج امت شاہ پر تنقید کرتے ہوئے کہا کہ بی جے پی کو بنگال کی فکر چھوڑ کر بھارت کو سونار بھارت بنانا چاہیے لیکن ان کے پاس ملک کے لیے کوئی ٹھوس منصوبہ نہیں ہے۔

مغربی بنگال کے جنوبی 24 پرگنہ کے ڈائمنڈ ہاربر کے پیلان میں پارٹی کارکنان سے خطاب کرتے ہوئے رکن پارلیمان ابھیشک بنرجی نے بی جے پی کے رہنما امت شاہ پر شدید نکتہ چینی کی۔

انہوں نے کہا کہ امت شاہ سمیت بی جے پی کے تمام رہنماؤں کو بنگال کے بجائے بھارت کی فکر کرنی چاہئے کیوں کہ ملک کی ترقی کے بارے میں سوچنا ضروری ہے۔ترنمول یوتھ کانگریس کے صدر ابھیشک بنرجی نے کہا کہ 'بنگال کی باگ ڈور محفوظ اور ملک کی سب سے بڑی سیکولر رہنما ممتا بنرجی کے ہاتھوں میں ہے۔ ممتا بنرجی بنگال کو سونار بنگلہ بنانے کے بالکل قریب پہنچ چکی ہیں اور اگلے پانچ برسوں کے دوران اس خواب کو حقیقت میں بدل دیں گی۔رکن پارلیمان ابھیشک بنرجی کا کہنا ہے کہ ملک گزشتہ سات سال سے بی جے پی کی قیادت والی مرکزی حکومت کے ہاتھوں میں ہے۔ انہیں ملک کو سونار بھارت بنانا چاہیے۔

انہوں نے کہا کہ جن کے ہاتھوں میں ملک کی باگ ڈور ہے انہیں اس کی کوئی فکر ہی نہیں ہے، ملک کی ترقی کے لئے ان کے پاس کوئی ٹھوس منصوبہ نہیں ہے۔

ترنمول کانگریس کے رکن پارلیمان ابھیشک بنرجی کا کہنا ہے کہ بنگال کے لوگ خواب نہیں بلکہ حقیقت کی دنیا میں جیتے ہیں۔ اسی وجہ سے ملک کی دوسری ریاستوں کے مقابلے ہماری حالت کافی بہتر ہے۔