لکھنؤ میں بی جے پی دفتر کے گیٹ نمبر 2 کے پاس ایک خاتون نے خود کو آگ کی لپٹوں میں جھونک لیا۔
اطلاعات کے مطابق خودسوزی کی کوشش کرنے والی خاتون کی شادی اترپردیش کے ضلع مہاراج گنج میں رہنے والے اکھیلیش تیواری سے ہوئی تھی۔ شادی ہونے کے بعد دونوں شوہر بیوی کے درمیان کسی بات پر جھگڑا ہوگیا اور دونوں کا طلاق ہوگیا تھا۔ اس خاتون نے طلاق کے بعد آصف نامی ایک مسلم نوجوان سے دوبارہ شادی کرلی تھی۔اس شادی کے بعد آصف روزگار کے سلسلے میں سعودی عرب چلاگیا، جس کے بعد آصف کے خاندان والوں نے متاثرہ خاتون کے ساتھ مارپیٹ شروع کردی۔
گھریلو تشدد سے پریشان ہوکر خاتون نے آج بی جے پی دفتر کے سامنے اپنی زندگی کو ختم کرنے کی کوشش کی اور خود کے اوپر کیروسین ڈال کر خود کو آگ کے حوالے کردیا۔
واردات کے بعد پولیس اہلکاروں نے جیسے تیسے آگ بجھائی اور خاتون کو سیول اسپتال میں داخل کروایا۔ اس وقت اسپتال میں ڈی سی پی، اے ڈی سی پی، انسپکٹر کے ساتھ ساتھ تمام پولیس اہلکار موجود تھے۔اب خاتون کا بیان درج کرکے آگے کی کاروائی کی جائے گی۔
