ریاست اترپردیش کے رامپور میں لاک ڈاؤن کے دوران عوام کے لئے راشن کی فراہمی حکومت اور انتظامیہ کے لئے ایک چیلنج بن گیا ہے۔
اکثر یہ دیکھنے میں آتا ہے کہ بڑی تعداد میں غیر مستحق افراد سرکاری راشن کو ناجائز طریقہ سے حاصل کر لیتے ہیں جس سے بڑی تعداد میں راشن کے مسحقین افراد راشن سے محروم رہ جاتے ہیں۔
یہ راشن مافیا صرف عوام میں سے ہی نہیں ہوتے ہیں بلکہ بڑی تعداد میں وہ لوگ ہوتے ہیں جو عوام تک راشن کی فراہمی کے کام میں سرکاری طور پر جڑے ہوتے ہیں۔
گذشتہ دنوں کئی ایسے معاملے بھی سامنے آئے ہیں جس میں افسران سے لیکر ڈیپو مالکان تک پر راشن کے غبن کے الزامات عائد ہوئے تھے۔
یہی وجہ ہے کہ اس مرتبہ ضلع انتظامیہ رامپور آنجنئے کمار سنگھ نے راشن فراہمی کو لیکر اپنی سخت ہدایات جاری کرکے اپیل کی ہے کہ راشن کارڈ ہولڈرز ہی اپنا راشن حاصل کریں اور اس درمیان کوئی بھی شخص ناجائز طریقہ سے راشن حاصل کرتا پایا گیا تو اس کے خلاف سخت کارروائی کی جائے گی۔
