ہاتھرس گینگ ریپ اور قتل کیس کی تحقیقات اور عدالتی سماعت پر سپریم کورٹ آج 12 بجے اپنا فیصلہ سنائے گا۔
چیف جسٹس کی صدارت والی بینچ اپنے فیصلے سے یہ طئے کرسکتی ہے کہ ہاتھرس کیس کا ٹرائل اترپردیش سے دہلی منتقل کیا جائے یا نہیں۔
کورٹ اس تعلق سے بھی فیصلہ سنائے گا کہ گواہوں اور متاثرہ خاندان کی حفاظت سے متعلق اضافی احکامات دینے کی ضرورت ہے یا نہیں۔ اس کے علاوہ یہ بھی فیصلہ آسکتا ہے کہ سی بی آئی جانچ کی نگرانی سپریم کورٹ کرے گا یا نہیں۔
سپریم کورٹ میں متاثرہ خاندان نے اپیل کی ہے کہ اس کیس کا ٹرائل دہلی میں کیا جائے، کیس سے متعلق ایک مفاد عامہ کی عرضی داخل کی گئی ہے جس میں کہا گیا ہے کہ تحقیقات کی نگرانی سپریم کورٹ و ہائی کورٹ کے موجودہ یا سابق ججوں سے کرائی جائے۔
عرضی کے مطابق اترپردیش میں اس کیس کی تحقیقات اور سماعت غیر جانبدارانہ طور سے نہیں ہوسکے گی اس لیے کیس کو دہلی ٹرانسفر کیا جائے۔
واضح رہے کہ اترپردیش کے ضلع ہاتھرس میں 14 ستمبر کو ایک 19 سالہ دلت لڑکی کے ساتھ اجتماعی جنسی زیادتی کرنے کے بعد ملزمین نے اسے بے دردی سے ہلاک کردیا تھا۔
