سہارنپور کے دیوبند علاقہ میں ایک شوروم میں پولیس اہلکاروں کے ذریعہ تاجر کو دھمکی دینے کی ویڈیو وائرل ہونے کے بعد پولیس افسران نے جانچ کے احکامات دیئے ہیں۔ حالانکہ تاجران نے ناراضگی کا اظہار کرتے ہوئے مذکورہ پولیس اہلکاروں کے خلاف سخت کارروائی کا مطالبہ کیا ہے۔
تفصیل کے مطابق ریاست میں برسراقتدار آنے کے بعد سے ہی بھلے ہی وزیر اعلیٰ اترپردیش یوگی آدتیہ ناتھ پولیس اہلکاروں کو عوام سے دوستی بناکر کام کرنے کے احکامات دے رہے ہوں لیکن وردی کے رعب کے چلتے پولیس اہلکار وزیر اعلیٰ اترپردیش کے احکامات کی دھجیاں اڑارہے ہیں۔
گزشتہ روز دیر شام ایک سب انسپکٹر شہر کے مینا بازار میں کپڑوں کے شو روم میں پہنچے اور خریدے گئے سامان کو واپس کرنے کے لئے کہنے لگے۔ شوروم کے مالک نے جب ان سے مذکورہ سامان کا بل اور ٹیگ مانگا تو سب انسپکٹر طیش میں آگئے اور پھر انہوں نے پولیس والا رعب دکھاتے ہوئے کسی کیس میں پھنسانے کی دھمکی دے ڈالی، اس سے پہلے کہ یہ معاملہ رفع دفع ہوتا، دوکان میں نصب سی سی ٹی وی کیمرے کی کلپنگ سوشل میڈیا میں شام ہوتے ہی وائرل ہوگئی۔
سوشل میڈیا میں کلپ وائرل ہوتے ہی دیوبند کے تاجران میں ناراضگی پیدا ہوگئی اور وہ جمع ہوکر دیوبند کوتوالی پہنچ گئے، اتنا ہی نہیں اس واقعہ کی اطلاع تاجران نے اعلیٰ افسران تک پہنچا دی۔
بتایا جاتا ہے کہ اعلیٰ افسران نے اس واقعہ کو سنجیدگی سے لیتے ہوئے جانچ کے احکامات دیئے ہیں۔ جب کہ دیوبند پولیس اس معاملے کو غلط فہمی کا بتاکر رفع دفع کرنے کی کوشش میں لگی رہی۔ اس سلسلہ میں سی او رجنیش اپادھیائے نے بتایا کہ معاملہ ان کے علم میں ہے اور پولیس معاملہ کی جانچ کررہی ہے۔ اگر پولیس اہلکار قصوروار پائے گئے توا ن کے خلاف محکمہ کی جانب سے کارروائی عمل میں لائی جائے گی۔
