ریاست اترپردیش کے ضلع مرادآباد میں گذشتہ 19 روز سے شہریت ترمیمی قانون کے خلاف احتجاج جاری ہے، دہلی کے شاہین باغ کی طرز پر ہو رہے اس احتجاج میں خواتین بڑی تعداد میں شریک ہورہی ہیں۔
مرادآباد کے عیدگاہ میدان میں جاری اس مظاہرے میں راشٹریہ جنتا دل کے ممبر پارلیمان منوج جھا نے بھی شرکت کی، اس دوران انہوں نے مظاہرین سے خطاب کرتے ہوئے مرکزی حکومت پر تنقید کی۔
منوج جھا نے کہا 'وہ بہار سے لالو پرساد کا پیغام لوگوں تک پہنچانے آئے ہیں، لالوپرساد یادو نے مشکل حالات میں بھی ہار نہیں مانی اور کبھی سمجھوتہ نہیں کیا، آپ (لوگ) سبھی لوگ ان کی صحت کے لیے دعا کریں'۔
انہوں نے مرکزی حکومت پر نکتہ چینی کرتے ہوئے کہا 'پورے ملک کی عوام کہہ رہی ہے کہ اس ملک کا مزاج سمندر والا ہے، اسے گندے نالے کی طرح مت بناؤ، امیرجنسی نافذ کر نے والوں نے کہا تھا کہ یہ ہمیشہ نافذ رہے گی لیکن ہوا کیا یہ سب جانتے ہیں۔
انہوں نے مزید کہا 'ہم آئین کے ساتھ کھلواڑ نہیں ہونے دیں گے، آج سبھی لوگ آئین کو بچانے کے لیے نکلے ہیں۔
