محض آتش بازی پر پابندی سے آلودگی کا مسئلہ حل نہیں ہو سکتا

آلودگی کے پیش نظر دہلی این سی آر سمیت ریاست اترپردیش کے مختلف اضلاع میں آتش بازی پر پابندی عائد کی گئی ہے۔ حکومت اور انتظامیہ عوام سے دیوالی جیسے تہوار کے موقع پر بھی آتش بازی نہیں کرنے کی اپیل کر رہے ہیں لیکن بارہ بنکی کے عوام صرف آتش بازی پر پابندی سے آلودگی کے مسئلے کا حل نہیں مانتے۔ ان کے مطابق اس کے لئے اور بھی اقدامات کرنے ہوں گے۔

آلودگی کے مسئلے پر ای ٹی وی بھارت نے جب بارہ بنکی شہر میں لگی پٹاخے کی دکانوں کے بازار کا معائنہ کیا تو وہاں موجود زیادہ تر افراد کا ماننا تھا کہ دیوالی کے موقع پر آتش بازی پر صرف پابندی عائد کر دینے سے آلودگی کا مسئلہ حل نہیں کیا جا سکتا ہے۔

ان کا ماننا ہے کہ دیوالی سال بھر میں ایک دفعہ ہوتی ہے جبکہ دیگر چیزوں سے مسلسل آلودگی ہوتی ہے۔ اس پر بھی غور کیا جانا چاہیے۔ لوگوں کا مشورہ ہے کہ آلودگی سے نمٹنے کے لئے دیگر اقدامات بھی ہونے چاہئیں۔

مقامی لوگوں نے کہا کہ بہت فیکٹریاں اور کمپنیاں ہیں، جو آلودگی میں اضافہ کر رہی ہیں۔ این جی ٹی کو ان پر قدغن لگانے کی ضرورت ہے۔

وہیں کچھ افراد ایسے بھی تھے۔ جو آتش بازی پر پابندی کے حمایتی تو ہیں، لیکن وہ دوسروں کو دیکھ کر خود پر قابو نہیں کر پاتے ہیں۔