بھارتیہ کسان یونین کے لیڈر مہک سنگھ نے مرادآباد میں ای ٹی وی بھارت سے بات کرتے ہوئے بتایا کہ سبھی کسانوں نے طے کیا ہے کہ کسانوں کے حقوق کے لیے دہلی احتجاج میں شرکت کی جائے گی۔ ساتھ ہی مرادآباد سے بھارتیہ کسان یونین کے سبھی کارکن اور عہدیدار دلی میں کسانوں کے ساتھ شرکت کررہے ہیں۔
حکومت سے اپنی مانگ کرتے ہوئے یونین نے کہا کہ کسانوں کی گنّا بقایا کی رقم جلد ادا کی جائے کسانوں کو دی جانے والی بجلی سستی کی جائے۔ کیوں کہ حکومت نے وعدہ کیا تھا کہ کسانوں کا گنّا بقایا سود سمیت دیا جائے گا۔ حکومت اپنے ہر کئے ہوئے وعدے سے انحراف کررہی ہے۔
بھارتیہ کسان یونین کے مہا سَچِیو مہک سنگھ نے آگے بولتے ہوئے کہا کہ اس سال کے گنّے کے دام بھی سرکار نے طے نہیں کئے ہیں جبکہ پچھلے سالوں کے گنّے کا بقایا ادا کیے جانے کی مانگ لگاتار ہوتی رہی ہے لیکن سرکار گنّے کا بقایا دینے کو تیّار نہیں ہے۔
یوم جمہوریہ کے موقع پر دلی میں پریڈ کئے جانے کے سوال پر بولتے ہوئے انہوں نے کہا کہ ہماری پوری تیاری ہے اور ہم 26 جنوری کو ٹریکٹر کے ساتھ دہلی پریڈ میں شرکت کررہے ہیں۔
