ریاست اترپردیش کے دارالحکومت لکھنؤ نے تہذیب و ثقافت کے ساتھ نوابی طورطریقے سے منفرد مقام حاصل کیا ہے، جس کی بہترین مثال لکھنوی چکن کپڑے پر نقش ونگار ہے۔ لکھنؤی چکن کپڑے نے گذشتہ چند برسوں میں کافی شہرت حاصل کی ہے۔ اب یہ کاروبار لکھنؤ کی شناخت بن چکا ہے۔
لکھنوی چکن کپڑے کی خاص بات یہ ہے کہ یہ کسی بھی طبقہ کی دسترس سے باہر نہیں ہوتا ہے، غریب امیر سرمایہ دار اسے شوق سے زیب تن کرتے ہیں۔
تاہم موجودہ دور کے نامساعد حالات نے کاروبار کو خسارے میں ڈال دیا ہے۔ لکھنؤ کے چوک علاقہ کی پارچہ والی گلی لکھنؤی چکن کپڑے کے لئے سب سے بڑا تھوک بازار ہے اب یہاں کی بیشتر دکانیں بند رہتی ہیں یا خانہ پری کے لیے کھلتی ہیں۔
اس طرح لکھنو کے نخاس آمین آباد میں بڑے پیمانے پر لکھنوی چکن کی ریٹیل دکانیں موجود ہیں لیکن شہر میں سیاحوں کی بڑی تعداد نہ پہنچنے سے یہاں کا بھی کاروبار متاثر ہے۔
مزید پڑھیں:لاک ڈاؤن سے کاروبار متاثر، رمضان کی رونقیں غائب
دوسری جانب لاک ڈاون اور اب ہفتہ وار بندی کی وجہ سے کاروباریوں کو سخت نقصان ہورہا ہے۔ چکن کپڑے کے کاروبار سے نہ صرف شہر کے افراد وابستہ ہوتے ہیں بلکہ گاؤں دیہات اور شہر کی خواتین بھی بڑی تعداد میں وابستہ ہوتی ہیں۔ لیکن کرونا وائرس کی موجودہ صورتحال نے کاروبار کو متاثر کیا ہے۔ دوسرے لاک ڈاؤن کے بعد اب کاروبار 50 فیصد سے بھی کم رہ گیا ہے۔
