رمضان میں جامع مسجد کا بازار گلزار

خیر و برکت کا مہینہ رمضان کے آغاز کے ساتھ ہی بارہ بنکی میں جامع مسجد کے سامنے کا بازار گلزار ہو گیا ہے۔ یہاں سحری اور افطار کے لیے کھانے پینے کی تمام اشیا دستیاب ہیں جس کی وجہ سے عصر سے سحری تک یہاں روزہ داروں کی آمد و رفت رہتی ہے۔

بارہ بنکی کی جامع مسجد اور مرکز کے سامنے رمضان میں رونق بڑھ جاتی ہے۔ لذیذ پکوانوں سے سجی یہاں کی دکانیں روزہ دار کو اپنی جانب متوجہ کرتی ہیں۔ عصر کے بعد سے تو روزہ دار جیسے یہاں کھنچے چلے آتے ہیں۔ روزے دار افطار کے بعد سے سحری تک یہاں کے لذیذ پکوانوں کا لطف لیتے ہیں۔

جامع مسجد کے سامنے کا یہ بازار صرف رمضان کے دنوں میں لگتا ہے۔ یہاں شیر مال، کباب، کولچہ، نہاری، بریانی، روسٹیڈ اور شیربرن جیسے لذیذ پکوان روزہ داروں کے لیے ہمہ وقت دستیاب رہتے ہیں۔

یہاں دوکان لگانے والے حضرات بھی روزہ داروں کی پسند اور ان کے ذائقہ کا خاص خیال رکھتے ہیں۔ خاص بات یہ ہے کہ یہاں کے دوکانداروں کا مقصد بھی تجارت نہیں بلکہ روزداروں کی خدمت کرنا ہے اور شاید یہی وجہ ہے کہ پورے شہر کے لوگوں کا اعتماد بھی ان دوکانوں پر بنا ہوا ہے۔