بزرگ کے ساتھ مار پیٹ کا ویڈیو وائرل ہونے کا معاملہ رکنے کا نام نہیں لے رہا ہے۔ اب غازی آباد پولیس نے ٹویٹر انڈیا کے منیجنگ ڈائریکٹر منیش مہیشوری کو قانونی نوٹس بھیج دیا ہے۔
پولیس جاننا چاہتی ہے کہ بروقت معلومات دینے کے باوجود مائیکرو بلاگنگ سائٹ نے ویڈیو کو وائرل ہونے سے کیوں نہیں روکا۔ نوٹس میں ٹویٹر کے منیجنگ ڈائریکٹر کو جواب داخل کرنے کے لئے 7 دن کی مہلت دی گئی ہے۔
گزشتہ 15 جون کو پولیس نے لونی بارڈر تھانے میں ایک کیس درج کیا تھا۔ اس معاملے میں ٹویٹر انڈیا اور 7 دیگر افراد کے خلاف کیس درج کیا گیا تھا۔ درج کی گئی ایف آئی آر میں واضح طور پر بتایا گیا ہے کہ جب ویڈیو غلط طریقے سے وائرل ہو رہی تھی، تو ٹویٹر نے کوئی ٹھوس قدم کیوں نہیں اٹھایا، جس کی وجہ سے ماحول کشیدہ ہوگیا۔ اس کی وجہ سے صورتحال مزید خراب ہونے کے دہانے پر پہنچ چکی تھی۔
اس نوٹس کا جواب دینے کے لئے ٹویٹر کو پورا ہفتہ ہے۔ ٹویٹر کمیونیکیشن انڈیا پرائیویٹ لمیٹڈ، ممبئی کے منیجنگ ڈائریکٹر منیش مہیشوری کو یہ نوٹس بھیجا گیا ہے۔
