اے ایم یو کی صد سالہ تقریبات پر سر سید اسکول کا قیام

علی گڑھ مسلم یونیورسٹی کی سو سالہ تقریبات ملک کے ہر حصّے میں منائی جا رہی ہیں، ان تقریبات کا مقصد یہ ہے کہ سر سید کے تعلیمی مشن كو آگے بڑھایا جائے چنانچہ سر سید اولڈ بوائز تنظیم کی زیر نگرانی اتر پردیش کے ضلع باغپت کے را ٹول گاؤں میں سر سید اسکول کا قیام عمل میں لایا جا رہا ہے ۔

مغربی اتر پردیش کا ضلع باغپت جہاں گنے کی مٹھاس کے لیے جانا جاتا ہے، وہیں اب باغپت کے رٹول گاؤں میں تعلیم کی بنیاد كو مضبوط بنانے کا کام بھی کیا جا رہا ہے۔

علی گڑھ مسلم یونیورسٹی کی سو سالہ تقریبات کے پس منظر میں مصلح قوم سر سید احمد خاں کو خراج عقیدت پیش کرنے کیلئے اے ایم یو سے تعلیم یافتہ اولڈ بوائز کی تنظیم سر سید ایجوکیشن فاؤنڈیشن نے اُن علاقوں میں انٹر کالج کی تعمیر کا بیڑا اٹھایا ہے جہاں ان اسکولوں کی سب سے زیادہ ضرورت ہے اور اسی کے تحت رٹول گاؤں میں سر سید اسکول کا سنگ بنیاد رکھا گیا۔

اس موقع پر ایک مقامی شخص نے بتایا کہ سر سید احمد خان کو بہترین خراج عقیدت یہ ہے کہ موجودہ دور میں انکے نقش قدم پر چل کر تعلیمی اداروں کا جال بچھایا جائے اور مسلمان قوم کو دوبارہ تعلیم و تعلم کی جانب راغب کیا جائے۔

مقامی لوگوں نے اولڈ بائز ایسوسی ایشن کے اس اقدام کی تعریف کی اور امید ظاہر کی کہ اس اسکول کی بدولے علاقے مین علم کی شمعیں فروزاں ہونگی۔