ریاست اترپردیش کے ضلع مظفر نگر میں آج کانگریس کارکنان نے صدر جنید رؤف کی سربراہی میں کسان مخالف بل کے خلاف ضلع کلیکٹریٹ کے احاطے میں احتجاج کیا اور ضلع مجسٹریٹ کو صدر جمہوریہ کے نام ایک میمورنڈم سونپا۔
اس دوران انہوں نے موجودہ مرکزی حکومت پر الزام عائد کرتے ہوئے کہا کہ حکومت کسانوں کی آمدنی دوگنا کرنے کی بات کر رہی ہے جبکہ حکومت کی طرف سے لایا گیا بل کسان مخالف ہے جس سے بڑے صنعتکاروں کو فائدہ ہوگا۔ پورے ملک کے کسان اس بل کے خلاف احتجاج کرنے کے لیے سڑکوں پر نکل رہے ہیں۔
انہوں نے مزید کہا کہ ہریانہ میں کسانوں کے ساتھ پولیس نے زیادتی کی، ہم اس کی مذمت کرتے ہیں۔ مظاہرین نے کہا کہ کسانوں پر پولیس کی طرف سے کیا گیا لاٹھی چارج ہمیں انگریزوں کی یاد دلاتا ہے۔ ہم مطالبہ کرتے ہیں کہ کاشتکاروں کے ساتھ جن افسروں نے زیادتی کی ہے ان کے خلاف سخت کارروائی کی جائے اور کسان مخالف قانون کو فوری طور پر واپس لیا جائے۔
