ریاست اترپردیش میں ضلع کاس گنج کے تھانہ سکندر پور کے ویشہ کے گرام بڑھولہ گاؤں میں دل دہلادینے والا واقعہ پیش آیا ہے۔
دراصل بھائی نے اپنی بہن کی وداعی کے وقت خود کو گولی مار کر خودکشی کرلی۔
بھائی کے خودکشی کی وجہ واضح نہیں ہوسکی ہے، جبکہ پولیس نے لاش کو تحویل میں لیکر پوسٹ مارٹم کے لیے بھیج دیا ہے۔
واضح رہے کہ بڑھولہ گاؤں میں شری پال کی بیٹی سورج مکھی اور رشمی کی ایک ہی دن بارات آنے والی تھی، لیکن لاک ڈاؤن کی وجہ سے سورج مکھی کو نو مئی کو ہی پانچ افراد آئے اور وداعی کراکر لیکر چلے گئے، وہیں منگل کی رات شری پال کی دوسری بیٹی رشمی کی وداعی کے لیے پانچ افراد بڑھولہ پہنچے۔
خیال رہے کہ ابھی شادی کی تقریب چل ہی رہی تھی کہ دلہن کے بھائی سنتوش نے گھر کی چھت پر جاکر خود کو گولی ماری جس کی وجہ سے اس کی موقع پر ہی موت ہوگئی، اور پورے گھر میں ماتم پھیل گیا
اسی دوران مقتول کے بھائی نیم سنگھ نے بتایا کہ سب کچھ ٹھیک چل رہا تھا، بہن کی شادی کے لیے بارات آئی تھی، کھانے پینے کا انتظام کیا جارہا تھا، لیکن ہمارا بھائی سنتوش صبح سے ہی شراب پی رہا تھا۔
انہوں نے بتایا کہ رات کو اچانک سنتوش چھت پر گیا اور اس نے خود کو گولی مارکر خودکشی کرلی، جب گولی کی آواز سنی تو ہم لوگ چھت پر گئے لیکن تب تک اس کی موت ہوچکی تھی۔
لتا کے بھائی نے بتایا کہ کسی سے کوئی دشمنی اور رنجش نہیں ہے اور نہ ہی کسی سے کچھ کہا سنی ہی ہوئی ہے، لیکن ایسا لگتا ہے کہ اس نے شراب زیادہ پی لی تھی اور شراب کے نشے میں خود کو گولی ماری ہو۔
