گذشتہ دنوں درگاہ کے سرپرست اور سجادہ نشین کو اطلاعات موصول ہوئی تھیں کہ نیپال کے مختلف علاقوں میں کورونا وائرس کے انفیکشن کے بعد بدحال معیشت کی وجہ سے لوگوں کو دو وقت کی روٹی کا بندوبست کرنا بھی مشکل ہو رہا ہے۔
درگاہ اعلیٰ حضرت کے سرپرست اور سجادہ نشین کے ہدایات کے مطابق ایک وفد بریلی سے نیپال پہنچا ہے۔ اس وفد میں شامل علماء کرام نے نیپال میں مسلم اکثریتی علاقوں میں مساجد میں نماز ادا کی اور مقامی لوگوں کو راشن کے امدادی پیکیٹ تقسیم کیے۔
خاص طو رپر مفتی سلیم نوری، مولانا شہاب الدین رضوی اور مولانا غلام مصطفیٰ رضوی نے نیپال کے ضلع 'کپل واستو' کے کرشن نگر میں جامعہ برکاتیہ میں سنی بریلوی مرکز اعلیٰ حضرت بریلی کا پیغام نیپال کی عوام تک پہنچایا۔
درگاہ کے میڈیا انچارج ناصر قریشی نے بتایا کہ بریلی سے تشریف لائے ہوئے علمائے کرام نے درگاہ کے سربراہ حضرت سبحانی میاں اور سجادہ نشین مفتی احسن میاں کا پیغام دیتے ہوئے درگاہ اعلیٰ حضرت کے ساتھ نیپال کے سنی مسلمانوں کے تعلقات کو مضبوط بنانے پر زور دیا۔
وفد میں اہم رکن کے طور پر شامل 'آل انڈیا تنظیم علماء اسلام' کے جنرل سیکریٹری مولا شہاب الدین نے کہا کہ امن و امان سُنّیت کی علامت ہیں۔
انہوں نے مزید کہا کہ کہ لوگوں کو انسانیت کی خدمت کے لئے بلا تفریق آگے آنا چاہئے۔ اس کے بعد قومی کونسل کے خزانچی مولانا مشتاق، جامعہ نعیمیہ کے پرنسپل مولانا عقیل نعیمی، حاجی کفایت اللہ خان، مولانا محمد احمد، مولانا صدام حسین منصوری، مولانا اکرم فیضی، مولانا احمد یار خان وغیرہ کی موجودگی میں یہ امدادی پیکیج تقسیم کیے گیے۔
مزید پڑھیں:
نوئیڈا: درجنوں ضرورت مندوں کی مدد
مفتی سلیم نوری نے بتایا کہ یہ تقسیم کل بھی جاری رہے گی۔ آخر میں، تمام علمائے کرام نے پوری دنیا میں امن اور کورونا کے خاتمہ کی دعا کی۔
