رامپور: رامپور میں ووٹنگ کے دوران ووٹرز کی تعداد پولنگ بوتھز پر کافی کم دیکھی گئی، وہیں سماجوادی پارٹی کے امیدوار عاصم راجہ نے ای ٹی وی بھارت سے بات چیت کرتے ہوئے پولیس افسران اور انتظامیہ پر سخت الزامات لگائے۔ انہوں نے کہا کہ سماجوادی پارٹی کے ووٹ کو متاثر کرنے کے لیے رامپور میں بہت بڑی سازش رچی گئی۔
اس سے متعلق سماجوادی پارٹی کے امیدوار عاصم راجہ نے بتایا کہ پولیس اور انتظامیہ کی پولنگ بوتھز کے باہر جاری دہشتگردی کی وجہ سے رائے دہندگان اپنے حق رائے دہی کا استعمال نہیں کرسکے۔ انہوں نے کہا کہ ضلع کے تمام مقامات پر ہمارے ووٹرز کو ڈرایا دھمکایا گیا۔ ان پر لاٹھی ڈنڈے برسائے گئے۔ پولیس اور انتظامیہ ووٹرز کو پولنگ بوتھز تک جانے نہیں دی، انہیں جبرا روکا گیا۔ متعدد مرتبہ ان معاملوں کی شکایت بھی کی گئی لیکن ہماری کوئی سنوائی نہیں ہوئی۔ انہوں نے کہا کہ یہ کھلی دھاندلی ہے۔ واضح رہے کہ رامپور میں صبح 7 بجے سے ووٹنگ کا عمل شروع ہوا حالانکہ شام چھ بجے تک ضلع بھر سے صرف 43 فیصد ہی رائے دہندگان نے اپنے حق رائے دہی کا استعمال کیا۔
یہ بھی پڑھیں: Rampur Bypoll: رامپور ضمنی الیکشن میں ووٹرز میں جوش کی کمی
