نوجوان کو زندہ جلاکر کیا ہلاک، دو گرفتار

ریاست اترپردیش کے ضلع پرتاپ گڑھ ہیڈکواٹر سے 40 کلومیٹر مسافت پر تھانہ فتن پور علاقے کے بھوجینی گاؤں میں ایک نوجوان کو بہیمانہ طریقے سے درخت سے باندھ کر زندہ جلاکر ہلاک کر دیا گیا۔ مشتعل ہجوم نے پولیس ٹیم پر حملہ کرکے ان کی دو گاڑیاں جلا دیں۔ وہیں پولیس نے تین لوگوں کے خلاف قتل کا معاملہ درج کرکے دو ملزمین کو گرفتار کر لیا ہے۔

پولیس سپرنٹنڈنٹ ابھیشیک سنگھ نے بتایا کہ تھانہ فتن پور علاقے کے بھوجینی گاؤں میں گزشتہ شب امبیکا پرساد پٹیل (22) کو گاؤں کے ہری شنکر پٹیل، شبھم، رام ملن و گاؤں کے کچھ لوگوں نے درخت سے باندھ زندہ جلاکر ہلاک کر دیا۔

اطلاع پر پہنچی مقامی پولیس ٹیم پر مشتعل لوگوں نے حملہ کر ان کی دو گاڑیوں کو آگ لگا دیا۔ اضافی فورس نے موقع پر پہنچ کر حالات پر قابو پایا۔

پولیس نے مذکورہ قتل کے معاملے میں دفعہ 302/201 تعزیرات ہند کے تحت ہری شنکر پٹیل، شبھم و رام ملن سمیت تین ملزمین کے خلاف معاملہ درج کر ہری شنکر و شبھم سمیت دو ملزمین کو گرفتار کر لیا۔

انہوں نے بتایا کہ ملزم ہری شنکر پٹیل نے بیٹی کے ساتھ چھیڑ خانی اور اس کی فحش تصویر سوشل میڈیا پر وائرل کرنے کے معاملے میں مقتول امبیکا پرساد کے خلاف یکم مارچ کو کیس درج کرایا تھا۔ پولیس نے ملزم امبیکا کو جیل بھیجا تھا۔ وہ یکم اپریل کو ضمانت سے رہا ہوا تھا۔ مذکورہ رنجش کے سبب ملزمین پر قتل کا الزام ہے۔ پولیس معاملے کی تحقیقات کر رہی ہے۔