ریاست اترپردیش کے ضلع بریلی میں شہر کے اُپجا پریس کلب میں عام آدمی پارٹی کے عہدے داران اور کارکنان نے دہلی میں پارٹی کی بھاری اکثریت سے ہوئی فتح پر جشن منایا اور ایک دوسرے میں مٹھائی تقسیم کی۔
اس تاریخی جیت کے جشن میں تمام مذاہب کے لوگوں نے شرکت کی اور ایک دوسرے کو مبارک باد پیش کی۔
اس دوران مقررین نے واضح کیا کہ یہ ملک محبّت کی بنیاد پر بنا ہے، یہاں نفرت کی سیاست بہت زیادہ دنوں تک قائم نہیں رہ سکتی۔ دہلی کے اسمبلی انتخابات کے دوران پورے ملک نے دیکھا ہے کہ کس حد تک سیاسی ماحول میں نفرت کی چنگاری لگانے کی کوشش کی گئ۔ لیکن دہلی کے امن پسند شہریوں نے نیک نیت اور ترقی یافتہ فکر و ذہن کو ترجیح دیتے ہوئے عام آدمی پارٹی کے ہاتھوں کو مضبوط کیا۔
اس دوران تمام دیگر سیاسی پارٹیوں کے درجن بھر کارکنان نے عام آدمی پارٹی کی رکنیت حاصل کی اور آئندہ پارٹی کی پالیسیوں پر کام کرنے کا واعدہ کیا۔ جس میں خاص طور پر سماجوادی پارٹی، کانگریس، بہوجن سماج پارٹی، نیشنل لوکمت پارٹی وغیرہ کے کارکنان پارٹی میں شامل ہوئے۔
بریلی میں عام آدمی پارٹی کے ضلع صدر جنک پرساد نے کہا کہ بی جے پی پورے ملک میں ترقیاتی کاموں کے برعکس فرقہ وارانہ ہم آہنگی کو تقسیم اور تباہ و برباد کر دینا چاہتی ہے۔ یہ سب اس لیے بھی ہو رہا ہے کہ ملک میں خراب معاشی حالات، مہنگائی، بےروزگاری، جی ایس ٹی، گرتی جی ڈی پی اور تمام ایسے معاملے ہیں، جن کا بی جے پی کے پاس کوئی جواب نہیں ہے۔ لہذا وہ ہندو مسلم، بھارت پاکستان، ہندو راشٹرہ جیسے تمام مدعوں کو انتخابات میں اٹھاتی رہتی ہے۔
