تلنگانہ اردو اکیڈمی کی جانب سے ایوارڈ پروگرام کا انعقاد

عظیم مجاہد آزادی اور بھارت کے پہلے وزیر تعلیم مولانا ابوالکلام آزاد کے 131ویں یوم پیدائش کے موقع پر تلنگانہ اردو اکیڈمی میں ایوارڈ فنکشن کا انعقاد کیا گیا۔

اس پروگرام میں اردو کی خدمت کرنے والے شعراء، صحافیوں اور اساتذہ کو ایوارڈ سے نوازا گیا-

تلنگانہ اسٹیٹ اردو اکیڈمی میں اردو مسکن ہال میں مولانا ابوالکلام آزاد ایوارڈ فنکشن میں وزیرداخلہ محمد محمود علی، مشیر تلنگانہ اقلیتی بہبود عبدالقیوم خان کے علاوہ دیگر معزز شخصیات موجود تھیں۔

اس موقع پر وزیرداخلہ محمد محمود علی نے خطاب کرتے ہوئے کہا کہ اردو اکیڈمی نے اپنے خدمات کو عوام کے سامنے رکھا اور عظیم مجاہد آزادی اور بھارت کے پہلے وزیر تعلیم مولانا ابوالکلام آزاد کے 131ویں یوم پیدائش کے موقع پر تلنگانہ اسٹیٹ اردو اکیڈمی کی جانب سے ایوارڈ پروگرام منعقد کیا گیا-

انہوں نے دوران خطاب کہا کہ اردو اکیڈمی کی سرگرمیوں کا دائرہ کافی وسیع ہے۔ اردو کو روز مرہ میں شامل کرنا اور اسے پڑھنے لکھنے میں شامل کرنا ضروری ہے۔ اردو کے خبر رساں اداروں اور اردو کے لیے کام کرنے والی تنظیموں کی حوصلہ افزائی کرنے کا کام بھی کیا جانا چاہیے۔ سیمینار، مشاعروں کے انعقاد کے لیے مالی معاونت، اردو قلم کاروں اور شاعروں کو ان کی کتابوں کی اشاعت کے لیے جزوی مالی عنایت بنیادی طور پر اردو اکیڈمی کی سرگرمیاں اور اس کی اسکیمز اردو زبان و ادب کی ترقی و ترویج اور تحفظ کے لیے ہیں-

اس موقع پر ان کے ہاتھوں انعامات تقسیم کیے گئے-

اس برس مولانا ابوالکلام آزاد قومی ایوارڈ پروفیسر انور معظم کو دیا گیا جو شعبہ اسلامک اسٹڈیز عثمانیہ یونیورسٹی کے سابق صدر تھے-

دوسرے مخدوم ایوارڈ ڈاکٹر فاروق شکیل کو شاعری کے زمرے کے لیے دیا گیا۔ پروفیسر احساس بیگ کو فکشن کے لیے، ڈاکٹر عباس متقی کو طنز و مزاح کے لیے، رشیدالدین کو صحافت ایوارڈز دیے گیے جبکہ بیسٹ ٹیچر ایوارڈ عبدالرشید خان کو دیا گیا-