ریاستی حکومت نے ’فوڈ ڈیلیوری‘ سروس پر مکمل پابندی عائد کردی ہے۔
کابینہ کے اجلاس کے بعد وزیراعلیٰ کے سی آر نے پریس کانفرنس سے خطاب کرتے کہا کہ ڈیلیوری بوائز، سویگی اور زوماٹو کی خدمات پر تاحکم ثانی پابندی عائد کی جارہی ہے۔
انہوں نے کہا کہ کابینہ نے دہلی میں ایک پیزا ڈیلیوری بوائے کے ذریعہ 69 افراد میں کورونا وائرس پھیلنے کے واقعہ پر غور و خوص کیا اور فوڈ ڈیلیوری سرویس پر پابندی عائد کرنے کا فیصلہ لیا گیا۔
کے سی آر نے کہا کہ حکومت کورونا وائرس کو پھیلنے کے تمام ذرائع بند کرنا چاہتی ہے۔ انہوں نے تلنگانہ میں سات مئی تک لاک ڈاون میں توسیع کا بھی اعلان کیا۔
انہوں نے عوام کو مشورہ دیا کہ وہ لاک ڈاون کے دوران باہر سے کھانا منگوانے کے بجائے گھروں میں تازہ کھانا بناکر کھائیں۔
وزیراعلیٰ نے کہا کہ فوڈ ڈیلیوری سرویس سے حکومت کو آمدنی ہوتی ہے لیکن عوامی صحت سب سے اہم ہے۔
