سیف خان رات کے اندھیرے میں تقسیم کرتا ہے کھانے کا پیکٹ

کوروناوائرس کی دوسری لہر نے جہاں معمولاتِ زندگی درہم برہم کر دیا ہے وہیں، وبا کی روک تھام کے لیے نافذ لاک ڈاؤن اور رات کے کرفیو نے ہزاروں زندگیوں کو بھوکے رہنے پر مجبور کر دیا ہے۔ ایسے میں بہت سے ایسے افراد بھوکے لوگوں اور بے سہاروں کی بے لوث خدمت انجام دینے کی کوشش کرتے ہیں۔ انہیں میں حیدر آباد کا ایک نوجوان بھی ایسی کوشش کو انجام دے رہا ہے تاکہ بے سہارا افراد کے پیٹ کی بھوک کو مٹایا جا سکے۔

تلنگانہ کے شہر حیدرآباد سے تعلق رکھنے والے سیف خان اپنے خرچ سے روزانہ رات کے اندھیرے میں سڑک کنارے زندگی گزارنے والے لوگوں میں کھانا تقسیم کرتے ہیں۔ سیف خان تقریباً 100 لوگوں کو کھانے کا پیکٹ تقسیم کرتے ہیں۔

قلعہ گولکنڈہ کے رہنے والے سیف خان اپنے چھوٹے بھائی کے ہمراہ روزانہ 11 بجے رات سے ٹولی چوکی، نالہ نگر، مہدی پٹنم اور دیگر علاقوں میں گشت کرتے ہوئے روڈ پر رہنے والوں کو کھانا اور دیگر اشیا تقسیم کرتے ہیں۔

اس کے علاوہ سیف خان پیٹرول پمپ پر کام کرنے والوں اور اے ٹی ایم سنٹرس میں سیکورٹی گارڈز کے لیے بھی سحری کا انتظام کرتے ہیں۔