'سکریٹریٹ کی منہدم مساجد اسی جگہ تعمیر کی جائیں گی'

وزیراعلی کے چندر شیکھرراؤ نے ایک مرتبہ پھر اس بات کا اعادہ کیا ہے کہ سکریٹریٹ میں منہدم مساجد اسی جگہ تعمیر ہوگی۔

تلنگانہ کے وزیراعلی کے چندر شیکھرراؤ نے آج پھر ایک مرتبہ اس بات کا اعادہ کیا کہ سکریٹریٹ میں منہدم کردہ دو مساجد اسی مقام پر تعمیر کی جائیں گی۔ اس معاملے میں کسی کو شک کرنے کی ضرورت نہیں ہے۔

ریاستی اسمبلی میں مجلس کے فلور لیڈر اکبرالدین اویسی کی تجویز پر بیان دیتے ہوئے وزیراعلی نے کہا کہ مساجد اور مندر کو توڑنا ہمارا مقصد نہیں تھا اسی مقام پر دوبارہ دو مساجد تعمیر کی جائیں گی اور دو مساجد کے درمیان واقع زمین امام کی رہائش کے لئے مختص کی جائے گی اور مساجد کو وقف بورڈ کے حوالے کیا جائے گا۔