حیدرآباد میں ہیلپنگ ہینڈ فاؤنڈیشن کے صدر مجتبیٰ حسین عسکری نے بتایا کہ لاک ڈاون اور سیلاب کی وجہ سے سینکڑوں خاندان تباہی سے دوچار ہیں۔ انہوں نے کہا کہ فاؤنڈیشن کی جانب سے ایک سروے کیا گیا جس سے یہ ظاہر ہوتا ہے کہ حیدرآباد کے علاقے فلک نما، الجبیل کالونی، شاہن نگر، بالاپور، عثمان نگر و دیگر محلہ جات میں تقریباً 7 ہزار 200 خاندان کسمپرسی کے شکار ہیں۔
انہوں نے کہا کہ ایسے خاندانوں کے بچے اسکول کو ترک کر کے مزدوری کرنے پر مجبور ہوگئے ہیں۔ اس کے علاوہ 26 فیصد خواتین کو ان کے شوہروں نے چھوڑ دیا ہے اور اب وہ اکیلے زندگی گذارنے پر مجبور ہیں۔ وہیں، ان خاندانوں کے 80 فیصد نوجوان بے روزگار ہو چکے ہیں۔
سروے رپورٹ میں یہ بھی بتایا گیا ہے کہ سیلاب سے لاکھوں روپے کا نقصان ہوا ہے۔ متعدد دوکانوں میں پانی داخل ہونے سے سارا سامان تباہ ہوگیا اور سیلاب کا پانی گھروں میں داخل ہونے کی وجہ سے قیمتی سامان کے علاوہ روزمرہ کے سامان برباد ہوگئے۔
ہیلپنگ ہینڈ فاؤنڈیشن کی جانب سے متاثرہ علاقوں میں رمضان کٹس تقسیم کیے جارہے ہیں۔ مجتبیٰ حسین عسکری اہل افراد سے متاثرین کی زیادہ سے زیادہ مالی امداد کرنے کی اپیل کی۔
