تلنگانہ کے حضور آباد اسمبلی حلقہ کے ضمنی انتخاب کے سلسلہ میں اس حلقہ کے کانگریس انچارج پی کوشک ریڈی کی آڈیو سامنے آئی ہے جس کے بعد پارٹی نے ان کو وجہ بتاؤ نوٹس جاری کیا ہے۔
پارٹی کے ایک مقامی لیڈر سے فون پر بات کرتے ہوئے کوشک ریڈی نے کہا کہ حکمران جماعت ٹی آر ایس کا ٹکٹ ان کو حاصل ہوگا۔ انہوں نے کہا تھا کہ نوجوانوں کو جمع کریں جس کے لیے وہ رقم دینے تیار ہیں۔
فون پرہوئی یہ بات چیت تیزی کے ساتھ سوشیل میڈیا کے اہم پلیٹ فارمز پر وائرل ہوگئی۔ انہوں نے اس آڈیو میں کہا ہے کہ برسر اقتدار جماعت ٹی آر ایس کا اس حلقہ سے ان کو ٹکٹ یقینی ہے۔
انہوں نے کہا کہ وہ ہر نوجوان کو پانچ ہزارروپے دینے کے لیے تیار ہیں۔حال ہی میں ایک تقریب میں کوشک ریڈی نے ٹی آر ایس کے کارگذار صدر کے تارک راما راو سے ملاقات کی تھی جس کے پیش نظر اس فون پر ہوئی بات چیت کافی اہمیت کی حامل ہوگئی ہے۔
اس آڈیو کے سامنے آنے کے بعد کانگریس پارٹی نے برہمی کا اظہار کیا اور کوشک ریڈی کو وجہ نمائی نوٹس جاری کی۔ تلنگانہ پردیش کانگریس کی تادیبی کمیٹی کے صدرنشین کودنڈا ریڈی نے کہاکہ گذشتہ چند دنوں سے کوشک ریڈی ٹی آرایس کے لیڈروں سے قربت بنائے ہوئے ہیں۔ انہوں نے اس آڈیو لیک معاملہ کے منظرعام پر آنے کے بعد اندرون 24 گھنٹے وضاحت کرنے کی کوشک ریڈی کو ہدایت دی ہے۔
مزید پڑھیں:
واضح رہے کہ اراضیات پر غیر مجاز قبضہ کے الزامات پر کابینہ سے ای راجندر کی برطرفی کے بعد انہوں نے اس حلقہ سے استعفی دے دیا اور بی جے پی میں شمولیت اختیار کرلی ہے جس کے پیش نظر اس حلقہ کا ضمنی انتخاب ضروری ہوگیا ہے۔
یواین آئی۔
