تلنگانہ کے وزیر اعلی کے چندر شیکھر راؤ نے عہدیداروں کو ہدایت دی ہے کہ وہ عدالت کی جانب سے غیر زرعی جائیدادوں کے رجسٹریشن پر حکم التواء کو ہٹائے جانے کے بعد رجسٹریشن کا عمل شروع کریں۔ انہوں نے کہاکہ حکومت غیر زرعی اراضی اور جائیدادوں کے رجسٹریشن کا عمل شروع کرنے پوری طرح تیار ہے۔
حکومت اس ضمن میں عدالت کے اٹھائے گئے اُمور پر وضاحت پیش کرچکی ہے۔ وزیراعلی نے کہا کہ چونکہ اس ضمن میں مقدمے کی سماعت 23 نومبر کو مقرر ہے لہذا عہدیداروں کو 25 نومبر سے رجسٹریشن کا عمل شروع کرنے کیلئے تیار رہنا چاہیئے۔
حکام نے پیشگی طور پر ریاست بھر میں مواضعات ، ٹاؤنس اور شہری علاقوں میں جائیدادوں کی قیمتوں کا تعین کررکھا ہے اور کسی کو بھی ان قیمتوں میں تبدیلی کا اختیار نہیں ہے۔
واضح رہے کہ حکومت نے 23 نومبر سے غیر زرعی جائیدادوں کے رجسٹریشن کے آغاز کا اعلان کیا تھا لیکن ہائی کورٹ کے حکم التواء کے پیش نظر اس میں تاخیر کا امکان ہے۔
یہ بھی پڑھیں:حیدرآباد: 'بی جے پی بلدیہ انتخابات کو فرقہ وارانہ رنگ دینے کے فراق میں'
