جموں و کشمیر کے سرمائی دارالحکومت سرینگر میں کورونا وائرس کے پھیلاؤ کے متعلق مکمل جانکاری اور اس سے نمٹنے کیلئے لائحہ عمل مرتب کرنے کیلئے انتظامیہ نے پیر سے گھر گھر طبی سروے کا آغاز کیا ہے جو دو ہفتوں میں مکمل کیا جائے گا۔
اس سروے میں ضلع سرینگر کی پوری آبادی کو شامل کیا جائے گا جس کے لئے انتظامیہ نے 700 ٹیمیں تشکیل دی ہیں۔
شہر سرینگر کی کل آبادی 2011 مردم شماری کے مطابق 11لاکھ سے زائد ہے۔
ضلع میں کووڈ 19 وبا سے متاثرہ افراد کی تعداد 85 ہیں جن میں 47 کیسز ایکٹو (متحرک) ہیں جبکہ 37 افراد روبہ صحت ہو چکے ہیں۔ ایک معمر شخص کا اس وبا سے انتقال بھی ہوگیا ہے۔ جموں و کشمیر میں اس مہلک وائرس سے اب تک مرنے والوں کی کل تعداد چھ پہنچ چکی ہے۔
سرینگر میں 15 علاقوں کو انتظامیہ نے ریڈ زون قرار دیا ہے جہاں لاک ڈاؤن سختی سے نافذ ہے۔
طبی سروے کے متعلق ضلع سرینگر کے مجسٹریٹ شاہد اقبال چودھری نے ای ٹی وی بھارت کو بتایا کہ اس کا مقصد سرینگر کی پوری آبادی کا ڈاٹا جمع کرنا ہے تاکہ طبی ماہرین بہتر طریقے سے اس وبا کے پھیلاؤ کا اندازہ لگا سکیں اور ساتھ ہی انتظامیہ بھی کووڈ19 وبا سے نمٹنے کیلئے بہتر پلاننگ اور لائحہ عمل مرتب کر سکے۔
