کشمیر میں 22 جنوری سے برف باری کا امکان

محکمہ موسمیات نے 22 جنوری کی شام سے موسم میں تبدیلی کے ساتھ ہی برف باری کی پیش گوئی کی ہے۔

وادی کشمیر میں خشک موسم کے بیچ ریکارڈ ساز سردیوں کا سلسلہ برابر جاری ہے جس نے اہلیان وادی کو گوناگوں مشکلات سے دوچار کر دیا ہے، تاہم 22 جنوری سے موسم میں تبدیلی کے امکانات ہیں اور سردی میں کمی آ سکتی ہے۔

متعلقہ محکمے کی پیش گوئی کے مطابق وادی کشمیر میں 22 جنوری تک موسم مجموعی طور پر خشک رہنے کی توقع ہے۔

محکمہ موسمیات کے ایک عہدیدار نے بتایا 22 جنوری کی شام سے لیکر 25 جنوری تک جموں و کشمیر کے ساتھ ساتھ لداخ میں بھی برفباری ہو سکتی ہے۔ انہوں نے کہا کہ اس بار پھچلے کے مقابلے کم برفباری ہو سکتی ہے۔ رواں ماہ کی 3 تاریخ کو لگاتار 4 روز تک بھاری برفباری ہوئی تھی جس کی وجہ سے معمولات زندگی مکمل طور پر مفلوج ہو کر رہ گئی تھی۔ وادی کے فضائی اور زمینی راستے بھی اس برفباری کی وجہ سے کئی روز تک منقطع ہو کر رہ گئے تھے۔

واضح رہے کہ وادی کشمیر میں سردیوں کے بادشاہ چالیس روزہ چلہ کلان کے دور اقتدار کا نصف حصہ مکمل ہوچکا ہے۔ چلہ کلان نے اپنے دور اقتدار کے نصف حصے میں بھر طاقت کا مظاہرہ کرکے لوگوں کو اپنی موجودگی کا بھر پور احساس بھی دلایا۔

چلہ کلان 31 جنوری کو اختتام پذیر ہوگا جس کے بعد بیس روزہ چلہ خورد تخت نشین ہوگا تاہم اس کے دور میں سردیوں کے زور میں بتدریج کمی واقع ہوجاتی ہے۔