سٹی سینٹر ٹریڈرس کارڈی نیشن کمیٹی نے جموں و کشمیر کے لیفٹنیننٹ گورنر منوج سنہا سے وادی کشمیر میں کورونا لاک ڈاؤن کو کھولنے کی اپیل کی ہے۔
کمیٹی کے جنرل سکریٹری فرحان کتاب نے اپنے ایک بیان میں کہا ہے کہ لاک ڈاؤن کی وجہ سے لوگوں کا روزگار بری طرح سے متاثر ہوا ہے۔
انہوں نے کہا کہ تاجروں سے لے کر ٹرانسپورٹروں تک تاجر طبقہ بے حد متاثر ہوا ہے جس سے ان کے کنبے فاقہ کشی کے دہانے پر پہنچ گئے ہیں۔
موصوف جنرل سکریٹری نے کہا کہ حکومت کو جملہ متعلقین اور میڈیکل ہیلتھ ماہرین کے ساتھ ایک میٹنگ طلب کرکے لاک ڈاؤن کھولنے کے متعلق ایک فیصلہ لینا چاہئے۔
انہوں نے کہا کہ ہم حکومت کی طرف سے جاری گائیڈ لائنز پر عمل در آمد کو یقینی بنانے کے لئے بھر پور تعاون کریں گے۔
فرحان کتاب نے حکومت سے تاجر برادری کو ریلیف پیکیج دینے کی بھی اپیل کی۔
بتادیں کہ جموں وکشمیر میں بھی کورونا کی دوسری لہر کا قہر جاری ہے۔ انتظامیہ نے اس لہر کی روک تھام کو یقینی بنانے کے لئے یونین ٹریٹری کے سبھی بیس اضلاع میں مکمل کورونا کرفیو نافذ کر دیا ہے۔
یو این آئی
