رامبن: سلنڈر بلاسٹ میں چار افراد زخمی

جموں و کشمیر کے ضلح رامبن میں سلنڈر بلاسٹ میں ایک ہی کنبہ کے تین کمسن بچوں سمیت چار افراد زخمی ہو گئے ہیں۔ پولیس کی اطلاع کے مطابق میتراہ میں کرایہ کے مکان میں مقیم سی آر پی ایف کے جوان کے گھر میں آج صبح تقریباً آٹھ بجے گیس سلنڈر میں آگ لگنے کے بعد سلینڈر بلاسٹ ہو گیا، اس حادثے میں ایک خاتون سمیت تین کمسن بچے بری طرح جھلس گئے۔

مقامی لوگوں نے بچاؤ مہم شروع کر کے زخمیوں کو ضلح ہسپتال منتقل کیا، جہاں ابتدائی طبی امداد کے بعد گورنمنٹ میڈیکل کالج و ہسپتال جموں ریفر کر دیا گیا۔

زخمی کی شناخت ستیہ دیوی زوجہ راکیش سنگھ کٹوچ ساکنہ گہاڑی تحصیل راجگڑھ ضلح رامبن کے طور پر کی گئی ہے۔ اس کے تین کمسن بچے ساہل کٹوچ، سورو کٹوچ اور گورو کٹوچ کے طور پر ہوئی۔

بتایا جاتا ہے کہ راکیش کٹوچ سی آر پی ایف کا جوان ہے۔ ان کی ڈیوٹی چندرکوٹ میں تھی۔ پولیس نے معاملہ درج کر کے تحقیقات شروع کردی ہے۔