ریکھا گپتا ہوں گی دہلی کی وزیراعلیٰ

دہلی میں بی جے پی کے ارکان اسمبلی نے اپنا رہنما چن لیا ہے۔ ذرائع کے مطابق ریکھا گپتا دہلی کی نئی وزیراعلیٰ ہوں گی۔

نئی دہلی: دہلی اسمبلی انتخابات میں اکثریت حاصل کرنے والی بی جے پی نے آج ریکھا گپتا کو وزیراعلیٰ کے طور پر نامزد کرنے کا اعلان کیا ہے۔ یہ فیصلہ مرکزی مبصرین روی شنکر پرساد اور اوم پرکاش دھنکر کی موجودگی میں بی جے پی لیجسلیچر پارٹی کی میٹنگ میں کیا گیا۔ بانسوری سوراج اور پروین کھنڈیلوال سمیت بی جے پی کے ارکان نے پارٹی کے اہم اجلاس میں شرکت کی۔

دہلی اسمبلی کی کل 70 نشستوں میں سے بی جے پی نے 48 پر کامیابی حاصل کی۔ بی جے پی نے 27 سال بعد قومی دارالحکومت میں اقتدار میں واپس کی ہے۔ عام آدمی پارٹی، جس نے ایک دہائی سے زیادہ عرصے تک دہلی پر حکومت کی، کو حال ہی میں منعقد ہونے والے دہلی اسمبلی انتخابات میں صرف 22 سیٹیں حاصل ہوئیں۔

اسمبلی انتخابی نتائج کے 11 دن بعد بی جے پی لیجسلیچر پارٹی کی میٹنگ میں وزیر اعلیٰ کے نام کا اعلان کردیا گیا۔ ریکھا گپتا دہلی کی نئی وزیر اعلیٰ ہوں گی۔ چیف منسٹر کی حلف برداری جمعرات 20 فروری کو دوپہر 12:35 بجے رام لیلا میدان میں منعقد ہوگی۔ دہلی کے چیف سکریٹری کے ذریعہ بھیجے گئے دعوت نامے میں وزیر اعلیٰ کے ساتھ وزراء کی حلف برداری کا بھی ذکر کیا گیا ہے۔

قانون ساز پارٹی کی میٹنگ میں دہلی کے وزیر اعلیٰ کے عہدے کے لیے ریکھا گپتا کے نام کو متفقہ طور پر منظوری دے دی گئی۔