جئے پورکی صبا ظہیر خان نے گولڈ میڈل حاصل کیا

صبا ظہیرخان نے والدین کو یہ پیغام دیا ہے کہ وہ اپنی بچیوں کو اعلی تعلیم دلوائیں، جو وہ بننا چاہتی ہیں اس میں ان کا ساتھ دیں اور انھیں بہترین سے بہترین تعلیم دلانے کی کوشش کریں۔

ریاست راجستھان کے دارالحکومت جے پور کے پہاڑ گنج علاقے کی رہنے والی صبا ظہیر خان کو جمعہ کے روز راجستھان یونیورسٹی کی جانب سے گولڈ میڈل سے نوازا گیا۔

گولڈ میڈل سے نوازے جانے کے بعد صبا ظہیر خان راجستھان مسلم وقف بورڈ دفتر پہنچیں، جہاں راجستھان مسلم وقف بورڈ کے چیئرمین ڈاکٹر خانو خان بودھوالی کی جانب سے صبا کی حوصلہ افزائی کی گئی۔

صبا ظہیر خان کو یہ گولڈ میڈل ہوم سائنس سبجیکٹ میں ملا ہے، گولڈ میڈل حاصل کرنے کے بعد صبا ظہیر خان نے ای ٹی وی بھارت سے خاص بات چیت کی۔ خان نے بتایا کہ انھوں نے زندگی میں کبھی سوچا نہیں تھا کہ انھیں گولڈ میڈل سے نوازا جائے گا۔ 'آج گولڈ ملا ہے تو میں بہت خوش ہوں۔'

صبا نے بتایا کہ گولڈ میڈل ان کے والدین، عزیز واقارب کی رہنمائی اور سخت محنت کرنے کی وجہ سے مل پایا ہے۔

اس موقع پر صبا ظہیرخان نے والدین کو یہ پیغام دیا ہے کہ وہ اپنی بچیوں کو اعلی تعلیم دلوائیں، جو وہ بننا چاہتی ہیں اس میں ان کا ساتھ دیں اور انھیں بہترین سے بہترین تعلیم دلانے کی کوشش کریں۔

راجستان یونیورسٹی میں 113 طالب علم کو گولڈ میڈل سے نوازا گیا جس میں تین مسلم طالب علم شامل تھے۔