ریاست راجستھان کے دارالحکومت جے پور کے گھاٹ گیٹ علاقے میں واقع بھارت پیٹرول پمپ پر لوٹ کا ایک بڑا معاملہ سامنے آیا ہے، معاملہ گزشتہ شب کا بتایا جا رہا ہے۔
پیٹرول پمپ پر لوٹ کی واردات کا معاملہ پیش آنے کے بعد دارالحکومت جے پور کے لال کوٹھی تھانہ علاقے میں ایف آئی آر درج کروائی گئی ہے۔ پولیس نے پورے معاملے کی تحقیقات شروع کر دی ہے۔
وہیں پیٹرول پمپ مالک کی جانب سے پولیس کو سی سی ٹی وی فوٹیج بھی فراہم کیا گیا ہے، سی سی ٹی وی فوٹیج کی بنیاد پر ہی آگے کی تحقیقات کی جا رہی ہے۔
معلومات کے مطابق دیر رات تقریباً 12 بجے کچھ لوگ پیٹرول پمپ پر آئے اور یہاں پر کام کرنے والے ملازمین کے ساتھ مار پیٹ شروع کردی، تھوڑی ہی دیر میں یہ تمام لوگ مینیجر کے کمرے میں داخل ہو گئے اور بندوق کی نوک پر کمرے میں رکھے روپے لوٹ لیے۔
یہ بھی پڑھیں: شاہجہاں پور: 1.16 کروڑ روپئے مالیت کی منشیات برآمد، ایک اسمگلر گرفتار
پیٹرول پمپ پر کام کرنے والے ملازم رمیش نے بتایا کہ 'رات کو 11 بجے ہی پیٹرول پمپ کو بند کر دیا تھا، اس دوران بارہ بجے کے قریب کچھ لوگ موٹرسائکل سے آئے اور ہم کچھ پوچھتے اس سے پہلے ہی انھوں نے ہمارے ساتھ مارپیٹ شروع کردی اور آفس میں داخل ہوگئے۔
ہم نے اس کی اطلاع پولیس کو دی۔ پولیس موقع پر پہنچی، لوٹ کی واردات سامنے آنے کے بعد پورے جے پور میں پولیس کے ذریعے ناکابندی کرائی گئی ہے۔
